2 ka semana’ng ceasefire

Hinaut mahunong na sa hingpit ang gubat didto sa Middle East human nagkauyon ang Amerika ug Iran sa duha ka semana  nga ceasefire.

Ang ceasefire giingong resulta sa paningkamot sa Pakistan nga magkasabot ang Amerika ug Iran aron mahunong na ang gubat nga nakaapekto sa kalibutanong ekonomiya, labi pa sa mga nasud nga nagsalig sa supply sa lana gikan sa tunga-tungang sidlakan sama sa Pilipinas.

Bisan dili direktang apektado ang Pilipinas sa mga nanglupad nga bomba ug missile apan labihan ka dako sa epekto sa gubat sa atong ekonomiya. Sa kasamtangan kapin na sa P140 ang litro sa diesel nga maoy sagad gigamit sa mga pampublikong transportasyon.

Makalilisang ang epekto sa presyo ngadto sa mga negosyo ug pagkaon. Kun magpadayon ang gubat ug di mapugngan ang padayong pagsulbong sa presyo sa lana, daghan sa mga patigayon ang posibling mapugos sa pagpanirado.

Gani ang ubang kompaniya mihulagway sa kasamtangan nga sitwasyon nga mas grabe pa kay sa Covid-19 pandemic. Ang mga operator ug taxi ug modern jeepney mipasidaan na nga posibling mapugos sila paghunong sa ilang operasyon kun di gyud mapugngan ang pagsaka sa presyo sa mga produktong petrolyo.

Segun nila, 40 porsiyento na sa ilang mga sakyanan ang mihunong sa pagpamasahero tungod kay di maagwanta ang kamahal sa krudo ug gasolina. Nagnihit sab kuno ang mga pasahero tungod kay gawas nga bakasyon na ang ubang mga tunghaan, nipatuman sab og work from home ang ubang mga kompaniya. Ang ubang buhatan sa gobyerno sab upat nalang ka adlaw ang trabaho.

Busa dihang gipahibawo ang duha ka semana nga ceasefire daghan ang nakapangagho uban ang panghinaot nga sinugdanan na kini sa kalinaw. Samtang way dautan nga maglaom alang sa hingpit nga kalinaw,  apan nabalaka ko nga dili pa hingpit mahunong ang  kagubot.

Kini tungod kay lahi-lahi og paghulagway ang Iran ug Amerika sa kasamtangang sitwasyon. Samtang gipahibawo ni US President Donald Trump nga niuyon siya sa duha ka semana nga ceasefire tungod kay misugot ang Iran nga ablihan ang Strait of Hormuz alang sa mga barko nga magkarga og fuel, ang Iran nangangkon nga pabilin ang ilang control sa maong agianan.

Ang maong pamahayag sa Iran posibling makapainit na sab sa Amerika ug ihinayon ang bahad ni Trump nga papason ang tibuok sibilisasyon sa Iran.