Ang caroza sa Santo Entiero

Niadtong Biyernes Santo nahimong Batasan sa mga Parokya ang prusisyon sa Santo Entiero ug adornohan kini sa mga natahasan. Apan sa laing bahin kuyog ning maong adorno nga mga bulak nagpahipi usab ang mga patuo tuo nga daghan. Mao nga dili kalikayan nga inigkahuman saprusisyon magpunsisok ang mga tawo ug mag-ilogay sa mga bulak. Makaguba na hinuon sa imahen ug sa caroza.

Naandan nga mga bulohaton matag tuig apan subo palandungon nga daghan gihapon kanato ang wala gihapon makalingkawas sa atong pagtuo kinit ungod kay daghan nato ang nigakos gihapon sa patuo tuo labina gyud ning mga balaang mga adlaw sa Semana Santa.

Dunay mga tawo usab nga magbisyo taman sa ginhawa tungod kay patay lagi ang Ginoo panahon sa Biyernes Santo. Imbis balaanon kini, gihimo namang excuse ang kamatayon sa Ginoo aron mamahimong justified ang paghimo sa maong sugal ug uban pang mga bisyo. Kausa ra namatay ang Ginoo ug gani, gibuntog naman niya ang kamatayon. Buhi siya ug magpabiling buhi hangtud sa hangtud!

Makatarunganon ang giingon sa pari sa nag-viral nga video gumikan sa pag-inilogay sa mga bulak sa caroza. Ang maong pamatasan nagpaila lamang nga kadaghanan kanato ang nahimong hakog ug segurista bisan gani sa pagpangayo og pabor sa kahitas-an. Buot kitang makauna sa tanang mga butang apan ulahi diay kita mahitungod sa kamatuoran. Dili tungod kay wala nagkulang ang simbahan sa mga pahimangno.