Nag-power trip ang supervisor

Niadtong Marso 24 sa Barangay Sirao, dakbayan sa Sugbo, ang mga gagmay’ng daycare learners nindot na kaayo og mga sanina, ang mga ginikanan dako og pahiyom, ug ang mga maestra andam na unta nga motapos na gyud ang school year. Apan ang ilang kalipay kalit lang napawong. Napulihan kini sa kangiob ug kauwaw tungod sa usa ka "daycare supervisor" nag-tantrum ug nangasaba sa mga magtutudlo atubangan sa mga bata ug mga ginikanan nga nanambong.

Mora’g gisapot na kunong daan ang lady supervisor dihang nangayo og kape ug dayon nangayo usab kuno og ininit nga tubig. Nagsugod na ang moving up ceremony ug dihang ipahigayon na unta ang doxology, gipahunong kini sa daycare supervisor dihang wala makahatag ang magtutudlo sa gipangayo niining checklist.

Mihangyo ang matutudlo nga isunod nalang aron mapadayon ang seremonya kay dakong kauwawan nila ug sa mga bata nga mabalda ang seremonya. Apan misamot ang kalagot ug gipakauwawan og samot ang magtutudlo. Gani ang mga ginikanan nakahilak usab dugang sa paghilak sa gikasab-an nga maesta nga naghilak nga migawas kay gikuha ang gipangyong checklist ni bisor.

Napadayon man ang seremonyas apan nalangan og usa ka oras tungod sa power tip ni madam bisor. Pait nga kamatuoran. Ang mga anaa sa posisyon mao unta ang ehemplo sa professionalism. Isip supervisor, ikaw ang big sister sa grupo. Ikaw ang dapat mopakalma sa sitwasyon, dili ang mahimong mitsa sa kagubot.

Unsa na man lay mahinumduman sa mga bata niini? Ang graduation ceremony mao unta ang unang dako nga milestone sa ilang kinabuhi. Apan imbes nga ang ilang unang medalya ang ilang mahinumduman, ang nipilit sa ilang alimpatakan mao ang hulagway sa usa ka lider nga naninhawak ug nagpakaulaw sa ilang pinalanggang maestra.

Maayo na lang kay abtik ang Department of Social Welfare Services (DSWS) sa pagresponde. Sa gihimong imbestigasyon, nasuta nga duna gyud tinuod sayop ang maong supervisor, ug ang rekomendasyon mao ang pagtangtang kaniya sa serbisyo.

Sakto kini. Dili nato mahimong i-tolerate ang "power tripping" o ang pagpahungaw sa personal nga sapot ngadto sa mga sakop. Ang humanitarian consideration unta ang nipatigbabaw. Kon duna may pagkakuwang sa dokumento, mahimo ra kana hisgutan sa tago nga opisina, dili sa publiko atubangan pa gyud sa mga bata.

Hinaut nga mahimo kining leksiyon sa tanan. Ang papel nga wala ma-submit, dili gayud igong rason aron bastoson ang isi’g katawo. Ang respeto dili kinahanglan paliton—apan kini ang labing mahal nga butang nga mahimo nimong ihatag sa imong isig-ka tawo.