EDITORYAL — China namikil napud

Samtang nagsige og pahumot ang Chinese ambassador dinhi sa mga lokal nga opisyales sa mga LGUs sa Pilipinas, nagsige pud og pamikil ang ilang mga barkong panggubat sa mga pwersa sa Pilipinas nga nagbantay didto sa West Philipine Sea.

Niadtong Marso 7, 2026 na-detect sa missile-frigate sa Philippine Navy nga BRP Miguel Malvar ang Chinese corvette sa People’s Liberation Army-Navy duol sa Sabina Shoal , gibanabanang 150 kilometro gikan sa Palawan.

Gawas nga naa kini sa sulod sa 200 nautical miles nga exclusive economic zone sa Pilipinas, ni-illuminate o gigamitan sa maong PLA-N nga barko sa ilang fire control radar (FCR) ngadto sa BRP Miguel Malvar.

Ang barko sa Pilipinas adunay kapabilidad ma-detect ang mga radar nga gipuntariya kanila mao nga gi-warningan dayun sila sa BRP Miguel Malvar nga nakahibalo ang naulahi sa ilang gibuhat.

Ayha pa gipawong sa PLA-N ang ilang radar ug nipalayo. Ang FCR usa kini ka kapabilidad sa mga modernong barko nga gamiton sa pagsukod sa distansya sa laing barko nga ipasa ngadto sa ilang mga missiles.

Unsa man ning gibuhat sa China, pangbikil? Gusto nilang mouna og pabuto ang Pilipinas para duna silay rason nga ibubo tanang pwersa nila dinhi? Kung mahitabo ang miskalkulasyon, wala nay atrasay ug moulbo gyud ang dakong giyera.

Angay saludohan ang mga tropa sa BRP Miguel Malvar tungod sa ilang propesyonalismo ug disiplina.

Dili ni mao ang unang higayon nga gitarget og fire control radar ang mga barko sa Pilipinas diha sa WPS.

Pipila ka buwan na ang nakalabay sa dihang gibuhat sab ni sa laing Chinese corvette ngadto sa BRP Conrado Yap nga naka-detect sad sa ilang gibuhat ug gi-warningan ayha sab nihunong.

Karon ang pangutana, unsa may tumong sa maong barko sa China nganong ilaha man ni pirmeng buhaton?