‘STL out na sa Ilocos Sur, baka balik jueteng’
Ang pagwawakas ng Philippine Charity Sweepstakes Office (PCSO) sa Small Town Lottery (STL) operation ng S Grande Corporation sa Ilocos Sur ay nagbubukas ng agam-agam kung may tunay bang pagbabago sa sistema, o pabalik-balik lang ang siklo ng pagbibigay at pagbawi ng prangkisa.
Ayon sa PCSO, kailangang itigil ng kumpanya ang operasyon sa Marso 31, 7 p.m., at isuko ang lahat ng records, remittances, at kagamitan. Sa opisyal na paliwanag, bahagi ito ng regular na pagpapatupad ng patakaran at pagtiyak ng tamang koleksyon ng kita para sa charity funds.
Ngunit sa aktwal na sitwasyon sa iba’t ibang lalawigan gaya ng Ilocos Sur, matagal nang may mga masangsang na isyu ang STL—mula sa umano’y padding ng remittances, leakages sa kita dahil malamang ang operator din ang nagpapatakbo ng “bookies” upang makaiwas sa intrega sa gobyerno, hanggang sa impluwensiya ng mga may interes sa operation.
Dahil dito, marami ang naniniwalang hindi pa rin ganap na nalilinis ang patakbo ng STL.
Kasabay ng termination ng prankisa ng S Grande Corp, nagbukas ang PCSO ng panibagong bidding para sa Ilocos Sur at ibang lugar na rin.
Maaring ito ay pagkakataon para sa mas maayos na pamamahala, ngunit wari ng iba, baka gimik lamang ito para papalitan ang operator, hindi ang bulok na sistema nito.
Nakababahala rin ang appeal process, kung saan kailangang magbayad ng non-refundable bond ang mga gustong umapela kung inisyuhan ng termination. Ang bagsak nito, pera-pera pa rin ang mananaig.
Ang pinaka-hindik hindik na scenario na maaring mangyari sa kalalagyan ng STL sa Ilocos Sur at iba pang mga lugar ay baka mitsa ito ng pagbabalik ng jueteng gaya ng nangyari sa Albay.
* * * * *
Para sa komento: [email protected]
- Latest
