Dokumentado na sa Pilipinas ang Scarborough at Spratlys
Ani China Foreign Minister Wang Yi, dalawang dokumento ang batayan ng teritoryo ng Pilipinas. Ito ang 1898 Treaty of Paris at 1900 Treaty of Washington ng U.S. at Spain.
Masabi-masabi, ika nga. Totoong batayan ng teritoryo natin ang dalawang tratado. Pero mali ang pag-unawa ni Wang Yi sa mga ito.
Akala niya saad ng dalawang tratado na ang teritoryo natin ay batay sa geographic coordinates ng 1898 Treaty of Paris. Ibig-sabihin hindi sakop ang Scarborough Shoal at Spratly Isles.
Hindi alam ni Wang Yi na iba ang sinasakop ng ikalawang tratado, ang 1900 Treaty of Washington.
Matapos pirmahan ang 1898 Treaty of Paris, nabatid ng U.S. na hindi nito sakop ang ilang isla ng Pilipinas. Ito ang maliliit na pulo sa Batanes, Cagayan de Sulo, Sibutu, Scarborough Shoal, at buong Spratly isles. Nagpalitan ng mga liham ang U.S. at Spain. Sa huli, nagpirmahan sila ng 1900 Treaty of Washington.
Saad ng ikalawang tratado na sakop ng islas Pilipinas ang mga pulo sa labas ng 1898 Treaty of Paris. Ibig-sabihin, mas malawak pala ang teritoryo ng Pilipinas.
Tatlong mapa ang naging batayan ng U.S.:
- 1734 Murillo Velarde map, na ginuhit ng mga Pilipino sa utos ni Padre Pedro Murillo Velarde;
- 1808 Carta General del Archipielago Filipino, na ginuhit ng Direccion Hidrografia;
- 1875 Carta General del Archipielago Filipino, ginuhit din ng Direccion Hidrografia.
Inangkin ng U.S. ang tatlong mapa at muli itong inilathala nu’ng mga taong 1901, 1902, 1903, at 1904.
Pinapatrolya ni Manuel Quezon ang Scarborough at Spratlys.
- Latest
