Salamat sa pagduaw

Naglagiting ang init sa adlaw. Hapit na kadto maudto.  Human sa deliverance session sa usa ka dapit nilahos dayon ako pagduaw sa mga panimalay aron pagdala sa panalangin ug pag-ampo gikan sa parokya.

Kutas man tuod ang panaw apan makapahupay usab ang pahiyom sa matag panimalay nga nagkanayon: “Salamat sa pagduaw padre ug sa pagbendisyon sa among yanong pinuy-anan.”

Kining maong pagpasalamat nakapadasig usab Kanako nga magmapasalamaton sa bisan unsa nga anaa karon ug nahuptan.  Ang mga butang nga nahuptan bisan pa man kun gamay lamang ang angayan lang gihapon pasalamatan kay timaan kini nga gihatagan kita sa Dios sa kahigayonan aron sa uban mapaambit kini.

Sa laing bahin ang bisan unsang kalisdanan ug pagsulay nga mahimo natong masinati kahigayonan gihapon kini aron mamahimo kitang lig-on ug mahingpit diha sa atong panaw sa kinabuhi.

Ang pisikal nga presensiya gikinahanglan gayud agig pagpakita sa bisan unsang matang sa suporta. Pinaagi sa pagduaw mahimong makita usab nimo ang panginahanglan nga bisan pa man sa imong limitasyon ikaw duna gihapoy matampo.

Kay walay dato nga walay panginahanglan ug walay kabus nga walay ikatampo.  Salamat kaayo sa pagduaw.