EDITORYAL - Sulagma pagkadiskubre

Usa ka dakong kalamposan kontra ilegal nga drugas ang pagkasakop sa gibanabanang dul-an usa ka toneladang shabu sa Paluan, Occidental Mindoro niadtong Martes Marso 10 ug pagkasikop sa duha ka mga Chinese nationals pagkasunod adlaw diha sa maong lugar ug dugang pagkasakmit sa 30 ka kilong shabu ana gihapong adlawa.

Ang ilegal nga drugas nasakmit sa mga sakop sa 76th Infantry Battalion nga gipangayoan og tabang sa mga lokal nga residente bahin sa giabandonar nga nasangad nga speedboat nga giingong gisakyan og duha ka gidudahang Chinese nationals.

Pagtan-aw sa speedboat duna kini kargang 43 ka sakong shabu. Sa follow-up operation pagka-adlaw nga Miyerkules nadakpan ang duha ka Chinese nationals ug duna pay laing 30 ka kilong shabu nga narekober duol gihapon sa lugar.

Gawas sa duha, duna pay laing duha ka Pilipino nga nag-speedboat sab duol sa lugar nga giapil og sikop kay sila nitug-an nga gisuholan sila sa pagpangita sa duha ka na-missing nga Chinese nationals.

Kaning hitaboa maisip nga demalas para sa sindikato sa ilegal nga drugas nga nanagiya niini.

Apan swerte kini sa habig sa mga otoridad ug ilabi na sa katawhang Pilipino nga maoy biktima aning dautang epekto sa pagkagumon sa ilegal nga drugas.

Pero sulagma lang kini nga pagkasakmit, kay sa nanglabay nga mga buwan sa mga anti-illegal drugs operations kinilo nga shabu na ang nasakmit apan siguro nga mas daghan pa ang nabaligya na sa kadalanan. Nagpasabot nga duna gyuy mga pamaagi ang mga sindikato sa pagpasulod niini dinhi sa nasud nga wala gyud mabantayi sa mga otoridad. Anhing puntoha angay mopokus ang mga otoridad, kung asa ang agianan sa mga dagkong shipments sa shabu pasulod dinhi. Kay sa mga pantalan medyo lisud naman gyud tungod sa kahigpit sa seguridad. Sa mga hilit nga lugar na nila kini buhaton layo sa mata sa mga tawo ug sa mga otoridad.

Pila ka kinabuhi kaha sa mga Pilipino ang maguba kung nakalusot pa kini. Maayo lang unta nga ang sunod nga sama kadaghang masakmit, dili na tungod sa sulagma.