Nagpatak ang Metro

Naalarma si Senior Citizens Party-list Representative Rodolfo Ordanes sa nagkadaghan nga taho  kabahin sa mga hospital nga nagdumili pag-release sa ilang mga pasyente nga aduna pa’y bayronon.  Matud ni Ordanes, kalapasan kini sa Anti-Hospital Detention Act ug sa Zero Balance Billing Policy.  Kuyanap tinuod kining maong panghitabo apan angayan usab tan-awon ang posibilidad nga dili tapat ang gobyerno sa pagtuman sa pag-abaga sa bayronon. May kamatuoran ang pagya-komedya nga “Ang hospital dili na angay dangpan sa masakiton kay nahisama na kini karon sa taxi nga nagpunay’g patak ang metro samtang nag-parking.”  Fezteleern!

Blame game sa Malacañg

Matud pa ni Palace Press Officer Claire Castro nga nagtoo ang Malacañang nga mas maayo pa unta ang kahimtang sa Pilipinas kon wala pa molansad pagka-bise presidente si VP Sara Duterte. Daw may pagka-ipokrito ang pamahayag ni Castro. Dili ikalimod nga dako ang gikatampo ni Sara sa kadaugan ni Presidente Marcos. Labot pa, ang presidente man maoy nagdala sa timon sa pangagamhanan. Haum ang panahom nga, “Kon basolon ug sawayon nimo ang uban, nagpasabot lang kini nga gilikayan mo ang mga kamatuoran bahin kanimo.”  Muleeng!

Daw may gitabunan

Gitambagan sa Malacañang ang 18 ka mga kanhi miyembro sa Philippine Marine Corps nga dili sila magpagamit sa mga tawo nga nahilambigit sa flood control project anomaly tungod kay makadaut kini sa atong nasud.  Mahinumduman nga misumite og affidavit ang 18 ka kanhi sundalo nga nagmatood nga naghatud sila og binilyon nga kickback ngadto sa mga opisyal sa gobyerno lakip na ang presidente. Mora’g aduna ma’y buot tabunan ang Malacañang kabahin ni’ng maong isyu.  Haum ang panultihon nga, “Kon patiran nimo kanunay ang sampot sa tawo nga maoy responsible sa mga kahasol sa imong kinabuhi, dili ka gayod makatarong paglingkod og usa ka bulan.”  Madahaan!

Communication Gap

Mipasidaan si Cebu City Acting Vice Mayor Winston Pepito nga ang nagkalaksot nga problema sa basura sa dakbayan dili gayod masulbad kon magpadayon ang communication gap tali kang Mayor Nestor Archval ug sa konseho ug mahimong magtandang sa mga opisyales ngadto sa mga pagsaway. Ang krisis sa basura nagkagrabe na ug ang kakulang sa direksyon mahimong makapahunong sa pagbuhat sa angayang buhaton.  Sugyot sa usa ka city hall observer, Ángayan na tungale magtukod og coffee shop ang city hall aron didto ang mga opisyal maghimamat ug mag-storyahay.”  Bitaw no!

Sideline ang pagka-polis

Gitangtang sa katungdanan ang usa ka police officer nga sakop sa Metropolitan Police sa West Sussex, United Kingdom human masakpan nga nag-moonlight pagtrabaho isip barista samtang padayon nga nagdawat sa tibuok niyang sweldo sa pagka-polis. Dinhi sa ato, bisan nangulo pa ang polis og sindikato sa druga o mga tulisan, o ba kaha protector sa mga politiko, dili gayod mahilabtan, hinonoa, mapromote pa gani.  Haum ang obserbasyon nga, “Dinhi sa ato, sideline na lang ang pagka-polis kay ang mainline nila nga trabaho mao man ang pagpangulo sa sindikato.”  Pagkatoytoy!