Nakabintaha ba?

Miugong na usab ang dagan sa politika sa nasud sa dihang mideklara si Bise Presidente Sara Duterte nga modagan siya pagka-presidente sa 2028. Daghan ang nagyam-id kay lagi sayo pa kaayo ang iyang pagdeklara sa iyang politikanhong ambisyon.

Ambot kon unsay sangpotanan niining pagdeklara ni Duterte nga andam na siya sa bugnong lugaynon alang sa labing taas nga posisyon sa nasud. Usa ba kini ka bintaha sa iyang politikanhong karera?

Sa politikanhong kasaysayan sa atong nasud, daghan ang nainutil sa ilang sayong deklarasyon sa ilang intensiyon pagpapili pagka-presidente sa nasud. Sama pananglit ni kanhi Bise Presidente Jejomar Binay.

Humot si Binay sa katawhan kaniadtong bise presidente pa siya.

Kini tungod sa iyang maayong pagdumala sa dakbayan sa Makati diin nahimo siyang mayor sa halapad nga panahon, gikan sa panahon dihang lungsod pa kini.

Gani dako iyang labaw atol sa nasyonal eleksiyon kaniadtong 2010. Busa kampante gayud si Binay nga maoy mosunod ni Presidente Noynoy Aquino nga modala sa renda sa pangagamhanan sa nasud.

Apan napurnada iyang politikanhong ambisyon. Kini gumikan sa sunodsunod nga mga expose nga gipagawas sa iyang mga kontra sa politika kabahin sa kwestiyonable kuno niya nga kabtangan.

Sa iyang pagdeklara sa iyang intensiyon nga modagan pagka-presidente sa 2028, dako akong pagtuo nga nangandam na usab karon ang nga kontra sa politika ni Duterte pagbitad sa iyang imahe paubos.

Ania nay mga impeachment complaint nga gipasaka batok kaniya.

Ug alegre unya ang mosunod nga mga adlaw kay klarong mas mobukal pa unya ang mga isyu batok kaniya. Atong atangan ang sunod nga tsapter.