Konsabo ni Pajarillo?
Naabtan og kapin sa semana ang Chong Hua Hospital Mandaue sa pagtubag sa mga pagsaway sa ilang pagdumala sa kaso sa 21-anyos nga si Sean Andrew Pajarillo. Nga gipasanginlang hubog nga nipadagan sa iyang sakyanan ug nipatay sa 23-anyos nga negosyante nga si Kingston Ralph Cheng.
Tulipsay pa gyod ang ilang official statement: Wala maghisgot sa pasangil sa kapolisan nga wala pasudla ang mga imbestigador sa ospital ug naabtan og kapin sa 18 ka oras una balibari nga walay kahimanan ang ospital paghimo og alcohol test ni Pajarillo.
* * *
Sakto ang ospital pagtago sa mga detalye sa kahimtang ni Pajarillo tungod sa mga lagda sa privacy sa pag-atiman sa mga pasyente. Pero ang letrato ni Pajarillo nga nagtan-aw sa camera ug nag-V sign pipila ka oras human nasulod sa emergency room nagmatuod nga:
Istrikto gyod diay ang ospital pagpanalipod sa privacy sa pasyente; ug
Dili tandugon ang kahimtang ni Pajarillo ug wala mameligrong mamatay kon gituman pang awhag sa kapolisan, nga mandatory ubos sa Republic Act No. 10913 (Anti-Distracted Driving Act), nga drug ug alcohol tests ni Pajarillo.
* * *
Bakak ang pasigarbo sa ospital nga dawaton ang tanang pasyente bisan unsay ilang sitwasyon. Molalis ang mga nakatilaw sa aktuwal nilang gihimo (nga mao say gipatuman sa kasagaran sa pribadong mga ospital): Atimanon lang ang mga pasyente nga maka-deposito.
Usa sa ilang mga pasyente nireklamo atol sa among programang “Baruganan” sa YouTube nga bisan naglisod na wala siya isulod sa intensive care unit (ICU) hangtod nga nakatigom og P50 mil para sa deposito.
* * *
Nakuha sa ilang inahang ospital sa Cebu City ang hingpit nga suporta sa publiko dihang gikiha sa pamilya ni kanhi Gobernador Gwen Garcia ang ilang mga doktor atol sa pandemya sa Covid-19 niadtong 2020 sa tungod sa kamatayon nilang kanhi Mayor Nelson Garcia sa Dumanjug ug kanhi Mayor Marlon Garcia sa Barili.
Maglisod ang ospital pagkuha sa samang pagsalig sa mga Sugbuanon. Kon dili matarung sa pagpasabot ang mga pagduda nga nakigkonsabo sila sa pagpahuyang sa mga ebidensiya sa kapolisan. Nga makahulga sa kawsa pagkab-ot og hustisya para ni Kingston ug sa gikatahong uban pang mga biktima ni Pajarillo.
* * *
- Latest
