Nagtabon og malong

Segun kang AFP Chief Romeo S. Brawner, Jr., adunay nasigpatan nga struktura sa Bajo de Masinloc sa dihang mipahigayon ang AFP og aerial surveillance sa maong lugar, diin gipuy-an kini’g unom ka tawo. Wala pa masayod ang AFP kon unsay tinuod nga katuyoan niini.  Kanunay lang gyud maawahi ang atong kasundalohan sa pagbantay sa mga panghitabo sa atong kadagatan bisan sa kadako sa intelligence fund sa AFP. Matud pa sa akong silingan, “Basin naghabol o nagtabon og malong ang hingtungdan sa dihang nagtukod sila sa struktura mao nga wala kini makita dayon.”  Saoonz!

Daw mga bata

Mibalitok ang Malacañang sa kanhi posisyon niini nga mopatawag unta og special session taliwala sa gridlock nga nahitabo sa senado.  Namahayag ang Malacañang nga angayan nga resolbahon una sa senado ang ilang kasungian una pa mokonsiderar ang presidente sa pagpatawag og special session.  Gituohan nga ang dinalian nga pagpatawag og special session maghatag og kalig-on sa pagtoo nga adunay basbas sa presidente ang pundok ni Senador Win Gatchalian. Komento pa sa usa ka kritiko, “Ang matang sa atong mga senador karon nahisama na lang sa mga bata’ng walay buot nga kon maglalis, magpalaban man dayon sa ginikanan.” Fezteleern!

Former vs. ex-marines

Nanawagan ang AFP sa media ug sa publiko nga gamiton lang ang saktong deskripsyon sa mga binuhat nga giingong naghatud og mga maleta nga puno sa minilyon nga kwarta ngadto sa mga politiko. Inay mga “ex-marines, angayan tawgon sila nga mga “former Marines”.  Mora’g managsama ra man ang duha ka termino.  Apan bisan kon unsa pa’y itawag kanila, dili na man tingale makapausab ni makapa-menos sa gibug-aton sa ilang testimonya.  Makapahinumdum kini sa lalaki nga nanghambog nga nangalyas kuno siya sa pikas baryo aron dili siya mailhan. Matud pa niya, “Inay “Titing”, ako sila giingnan nga “Totong” ang akong pangalan.”  Pagkatoytoy!

Apil ihap ang TUPAD

Sumala sa taho sa Philippine Statistics Authority (PSA), mikunhod ang gidaghanon sa jobless nga Filipino gikan sa 2.58 million sa bulan sa Marso ngadto sa 2.41 million na lang sa bulan sa Abril.  Morag dili man reflective sa tinuoray nga sitwasyon ang taho sa PSA. Daghan pa man sa atong mga kaigsoonan ang estambay ug nagping-it sa kalisod tungod sa kakulang sa trabaho. Matud pa sa akong amigo, “Alang-alang og dili mokunhod ang unemployment nga giapil pagkwenta kadto ningtrabaho sa TUPAD.”  Madahaan!

Naghingapin nga burukrasya

Adunay dako’ng manufacturing investment nga matukod unya sa Cebu tungod sa halapad nga pagbul-og sa approval sa Philippine Economic Zone Authority (Peza) sa bulan sa Mayo, nga mipadayag sa padayon nga pagsalig sa rehiyon isip usa ka nag-una’ng ecozone destination.  Dayag nga kon hatagan lang og kasayon ang mga magpapatigayon sa pagpahigayon sa ilang mga negosyo, dali ra usab sila makabig nga mo-invest sa Pilipinas.  Apan sulagma ra kini nga panghitabo tungod sa naghingapin nga burukrasya. Mao kana’y giingon, “Sa usa ka burukrasya, ang mga naghimo sa balaod dili man maoy motuman niini.” Muleeng!