Unsay mahitabo kun dili mabayran ang buhis sa yuta?

Dear Atty. Divine,

Dunay yuta ang among mga ginikanan sa probinsya apan sukad sila namatay wa na g’yud mi makabisita sa maong lugar ug wa na sab namo mabayri ang buhis niini. I think, last namong bayad sa buhis, lima ka tuig na ang nakalabay. Ang akong pangutana kun unsa may mahitabo kun dili namo mabayran ang buhis sud sa pipila na ka tuig? Daghang salamat —Greg,

Dear Greg,

Isip sumusunod sa yuta sa imong ginikanan, aduna gyud kamoy obligasyon nga mobayad matag tuig sa realty tax niini ngadto sa City Hall or Munisipyo diin mahimutang ang maong property. Kun mapakyas mo sa pagbayad niini, hayan mag-increase ang inyong bayranan matag tuig tungod sa penalty. Ug kun dili gyud kini gihapon ninyo bayran sud sa pipila na ka tuigan hayan embarguhon na kini sa gobiyerno ug ipasubasta ug ang kita niini ilang gamiton isip bayad sa imong buhis. Ang maayo ninyong buhaton mao ang pagbayad sa buhis samtang wa pa kini embargoha sa gobiyerno aron dili sab mahanaw ang yuta nga hinaguan sa inyong mga ginikanan. Thank you and God Bless! Atty. Divine

Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.