EDITORYAL - Persona non grata

Luyo sa mga mainiton nga mga diskurso tali sa mga opisyales sa gobiyerno sa Pilipinas ug sa opisyales sa embahada sa China bahin sa West Philippine Sea, si Presidente Ferdinand Marcos Jr. mas gipiling magpabilin ang diplomatikong relasyon sa duha ka nasud.

Lanog kaayo ang mga panawagan nga ipadeklarar nga persona non grata si Chinese Ambassador Jing Quan tungod aning iyang pagka undiplomatic nga taras, pagpuntariya niya sa mga opisyales sa Pilipinas nga nidepensa sa WPS.

Gani 15 ka senador ang nipagawas og resolusyon nga nagkondenar sa iyang mga gipanghimo kay nagsusama na siyang usa ka troll sa social media, baratilyo kaayo og mga gipamahayag aron atakihon silang PCG Spokesman Commodore Jay Tarriela apil na si Senador Kiko Pangilinan tungod sa ilang baruganan bahin sa WPS.

Ang pagdeklarar og persona non grata sa usa ka tawo nagpasabot kini nga kining tawhana dili gusto sa mga tawo sa lugar nga nagdeklarar niini. Bisan mga ambassadors pwedeng i-persona non grata aron pailisan kini og laing opisyal.

Daan ng nipahibalo ang Department of Foreign Affairs nga usa kini sa mga bug-at kaayong diplomatic actions batok sa usa ka langyaw nga sakop sa usa ka diplomatikong miyembro sa embahada.

Pero husto ba kining gibuhat ni Marcos? Ang tubag ani, oo. Dili makaayo sa Pilipinas kun sundon ang emosyon sa mga Pilipino tungod kay gawas anang bikil sa WPS, duna pay laing maapektahang aspeto. Mas mosamot ang tension ug posibleng  daghan ang maapektahan. Ang importante, dili magpagawong sa China si Marcos aron mandoan si Tarriela ug sa uban pang mga opisyales sa gobiyerno nga mohunong sa pagsaway sa ilang mga ilegal nga binuhatan diha sa WPS.

Pwedeng ang ubang mga probinsya, lungsod, siyudad modeklarar kang Jing nga persona non grata agi og pagpadayag sa kayugot kaniya sama sa gibuhat sa Lungsod sa Kalayaan.

Dili undangan og saway tanang ilegal nga mga gibuhat sa China ilabi na diha sa Scarborough Shoal nga maoy ilahang gitutokan og maayo aron tuk-on ang resources sa Pilipinas ug dili makaatiman sa uban pang mga gibantayang teritoryo diha sa WPS.

Dili kini makadaut sa tibuok Pilipinas kondili pagpakita og baruganan.