Nahisulat sa tubig

Namahayag ang Department of Agriculture (DA) nga misaad ang mga rice millers ug mga rice traders nga i-mintinar nila ang buying price sa palay (P17 sa basa nga palay ug P21 sa uga nga palay) aron mapadayon nga adunay igong supply ingon man makiangayon’g presyo sa bugas ingon man masuportahan usab ang mga mag-uuma.  Dili tataw kon nahasulat ba ang maong saad busa dako pa’ng tulokibon kon tamdan ba kini sa tiunay sa mga nagsabot.  Kay matud pa bitaw sa pagya, “Ang kasabutan nga nahisulat lang sa tubig dili gani sibô sa kantidad sa papel nga gisulatan niini.” Muleeng!

Layo ra’s tinuod

Alang kang Senador JV Ejercito, ang dungan-dungan nga pagpasaka og kaso’ng impeachment batok sa duha ka tag-as nga opisyal sa nasud mahimong mohatag og signal nga dili lig-on ang politikanhong kahimtang sa Pilipinas ngadto sa international community.  Mora’g detach man sa reyalidad ang senador.  Dugay ra man nga nasayran sa international community nga potically unstable ang atong gobyerno.  Matud pa sa akong amigo, “Niresulta na ang panganti ni Quezon nga ‘mas maayo pa’ng dumalahon sama sa impyerno ang Pilipinas sa mga Pilipino, kay sa dumalahon sama sa langit ang Pilipinas sa mga langyaw.”  Fezteleern!

Bato’ng nagligid-ligid

Atol sa birthday ni Senador Ronald “Bato” de la Rosa, mitimbaya si kanhi Presidente Rodrigo Duterte kaniya sa pag-ingon nga “magmagahi ka sama sa ‘bato’ luyo sa balita nga adunay warrant of arrest nga giluwatan ang ICC batok kaniya.  Nausab na diay karon ang paghulagway ug kahimtang sa senador.  Sa una “sama siya sa bug-at nga bato nga nagtungkawo lang sa taas nga bahin sa bungtod ug dili gayod mapi-og; apan karon, tungod sa ICC warrant, nahisama siya sa bato nga naapil sa landslide ug nagpunay na lang og ligid paingon ngadto sa tiilan sa bungtod.”  Madahaan!  

Huyang pa ang abaga

Nanawagan si Cebu City Mayor Nestor Archival sa mga ginikanan ug pamilya nga anaa sa kalisod nga dili magmakuli pagpangayo’g tabang sa dakbayan inay biyaan o ilabay lang ang ilang mga anak.  Alang sa mayor, walay igo’ng rason o sirkumstansya aron hikawan ang bata sa iyang katungod sa pagpangga ug pag-amuma.  Dakong sayop ang pag-abandonar sa bata kay ginaingon baya nga “Ang abaga sa usa ka bata, gawas nga huyang pa, dili angay nga maoy mopas-an sa gibug-aton sa suliran nga gimugna sa mga ginikanan.”  Mao maan!

Matud pa ni Cebu City Councilor Pastor “Jun” Alcover, mahimo untang kapugngan ang trahedya nga nahitabo nga pagdahili sa Binaliw landfill busa angayan nga palawman ang imbestigasyon kabahin niini.  Adunay pagtuko ang ubang sakop sa konseho sa maong lakang tungod sa kakomplikado sa sistema sa landfill ingon man sa kakulang nila sa technical nga kahibawo  pagdeterminar sa tukma nga mga safety measures.  Dili tinuod maayo kon gamitan lang og “oido” ang imbestigasyon.  Kay kon kulang sa kasinatian ang mo-imbestigar, “basin mahisama lang kini sa “abog” nga magtuyok-tuyok” lang inig huyop sa hangin.”  Pagkatoytoy!