Misamot ang pagsaway

Human magkamuritsing sa mga pagsaway tungod sa lapad nga problema sa basura sa dakbayan, nikatap sa social media ang hulagway ni Mayor Nestor Archival nga nanilhig sa basura sulod sa transfer station diin temporaryong gibutang ang mga basura samtang nagpaabot nga hakuton paingon sa landfill. Apan inay mahimoot sa gibuhat sa mayor mas misamot ang pagsaway nga iyang naangkon gikan sa iyang mga kritiko. Alang sa mga kritiko ni Archival nga una na nga mihingalan sa mayor nga “bogo” tungod sa kapakyas pagsulbad sa problema sa basura, drama ug pakitang tawo ang gibuhat sa mayor.

Apan ang tubag sa mayor sa iyang mga kritiko, dili drama ang iyang gibuhat kun dili usa ka panag-ingnan alang sa tanang molupyo sa dakbayan. Isip mayor, matud ni Archival nga ang iyang pagpanilhig ehemplo alang sa uban nga angayang sundon aron maibanan ang kahugaw sa dakbayan.

Matud sa mayor nga buot niyang ipakita sa kadaghanan nga importante ang pagpanglimpiyo sa palibot aron malikayan ang pagkatag sa basura nga makabara sa mga agianan sa tubig nga mamahimong hinungdan sa laing problema sa baha.

May punto si Archival apan dili nimong mabasol ang iyang mga kritiko kun gihilasan silang nagtan-aw sa mayor kay bisan unsaon niyag am-am ang publiko dili matuis ang kamatuoran nga salida ra gyud ang iyang gihimo.

Dili ang pagpanilhig ang problema sa syudad nganong nanimaho ang wala makolektang basura kun dili ang kapakyas sa kagamhanan pagsiguro nga duna tay kalabayan sa hugaw. Bisan pa og manilhig ang tanang molupyo sa syudad tibuok adlaw og dili mahakot ang basura kay walay dapit kalabayan manimaho gihapon ang dakbayan.

Kun gusto gyud sa mayor nga mahimong ehemplo sa uban, angayan niyang dalion ang pagpangita og solusyon sa kakuwang og dapit nga kalabayan sa basura. Kapila na sila magbalik sa Japan aron magtuon sa teknolohiya nga gigamit sa maong nasud apan hangtod ron wala gyuy resulta.

Kun abli ang mga opisyal sa syudad sa mga modernong teknolohiya sa paghipos sa basura ug kun duna silay “sense of urgency” sigurado ko nga daghan ang mga pribabadong kompaniya nga andam motabang sa syudad pinaagi sa public-private partnership.