Malipayong Pasko

Sa umaabot nga pipila ka adlaw, magsaulog na usab ang katawhang Pilipinhon sa tinuig nga Pasko. Kini ang usa sa labing importante nga adlaw sa Kristiyanismo kay panahon kini sa pagkatawo ni Jesu Kristo.

Espesyal ang atong pagsaulog sa Pasko karong tuiga, ilabina alang sa mga Sugboanon kinsa bag-o pa lamang naka-recover sa mga katalagman nga mihapak sa probinsiya sa niaging mga bulan.

Mora'g bag-o pa lamang nahitabo ang kusog nga linog nga mitay-og sa lalawigan kaniadtong gabii sa Septiyembre 30. Daghan ang kinabuhi nga nakalas, ilabina didto sa Northern Cebu, ang epicenter sa maong linog.

Human sa maong kalamidad, dinhi nato nakita ang talagsaong bayanihan sa mga Sugboanon kinsa naghiusa alang sa pagtabang sa mga biktima sa magnitude 6.9 nga linog, usa sa labing kusog nga miigo sa lalawigan.

Apan paglabay sa duha ka bulan, laing ngilngig nga katalagman ang misulay na usab pagtay-og sa kalig-on sa mga Sugboanon. Ug mas deadly ug dako nga danyos ang dala sa ikaduhang kalamidad.

Kaniadtong Nobiyembre 5, nahigmata na lamang ang mga Sugboanon sa dihang grabeng baha ang misanap sa Metro Cebu human sa makusog nga ulan nga gibubo ni Bagyong Tino sa Sugbo ug tibuok Visayas.

Mokabat sa 150 ang kinabuhi nga nakalas sa maong kalamidad. Kini ilabina didto sa mga lugar nga duol sa mga dagkong suba diin mi-overflow ang tubig. Gani usa ang among panimalay sa dakbayan sa Talisay nga naigo sa baha.

Niining atong pagsaulog sa Pasko, ato unang ihikling ang atong mga kasub-anan dala sa mga katalagman.

Hinuon angay kita nga magmaya gumikan sa padayong grasya nga gibubo sa kahitas-an kanato.

Malipayong Pasko!