Ayaw ihikaw ang hustisya

Sa akong pagsulat niini kagahapon sa hapon, wala pay suspek nga natumbok ang kapolisan sa dakbayan sa Mandaue kalabot sa pagpatay sa usa ka abogado didto sa Barangay Balikid sa naiging Huwebes.

Nagpasabot ba kini nga blangko pa sila hangtud karon sa hinungdan sa kamatayon ni Attorney Duke Ramil Perral Lincuna, kinsa nagmaneho sa iyang sakyanan sa dihang giambus sa duha ka mamumuno?

Hinuon adunay duha ka anggulo nga gitutokan karon sa mga sakop sa Mandaue City Police Office sa ilang pagsusi sa linuog nga pagpatay kang Lincuna. Ug kini mao ang personal ug trabaho.

Sa anggulo sa trabaho, ang biktima, gawas sa iyang pagkaabogado, usa ka certified public accountant nga adunay posisyon isip revenue officer sa lokal nga buhatan sa Bureau of Internal Revenue.

Ang BIR nanawagan karon og dinaliang hustisya sa kamatayon ni Lincuna ug mikondena sa mga mamumuno. Matud sa maong ahensiya, usa ka respetado si Lincuna nga revenue officer ilalum sa Large Taxpayers Division niini.

Ug kon personal ang rason sa kamatayon sa maong abogado ug accountant, lisod pag-espekular kon unsa gayud ang hinungdan. Ang kapolisan lamang mismo ang makatubag niini pinaagi sa ilang subsob nga inbestigasyon.

Kinahanglan nga paspasan sa otoridad ang ilang pagsusi sa pagluthang sa maong abogado. Nakatutok karon ang katawhan sa dagan sa ilang imbestigasyon tungod sa ka high-profile sa maong kaso.

Manghinaut lamang kita nga masulbad sa kapolisan sa dili madugay ang kaso sa pagpatay lang Lincuna. Dili kita makatugot nga ang iyang kaso madugang na usab sa lista sa mga abogado nga biktima sa linuog nga pagpatay nga hangud karon nahikawan sa hustisya.