Pag-ungot ni Wilma

Labing dakong problema sa bagyong Wilma, ug angay natong pasalamatan sa iyang kahinay ug kapakyas sa pagbubo og makalilisang nga uwan sa Sugbo, mao ang Amihan. Kay samtang nagsalig si Wilma sa kainit sa alisngaw sa dagat aron madugangan ang iyang puwersa ug masubay ang iyang rota, ang bugnaw ug uga nga hangin sa Amihan maoy nilawgaw niya.

Maong imbes motugpa sa yuta sa Leyte o Samar niadtong Biyernes sa gabii o gahapon (Sabado) sa kadlawon, si Wilma padayon pa nga nagkamang paingon sa Eastern Visayas sa akong pagsuwat niini.

* * *

Labing dakong babag sa agianan ni Wilma mao ang higanteng bungbong sa hangin sa amihanang bahin sa Pilipinas nga gitawag nilang Director Oscar Tabada ug ubang meteorologists nga high-pressure wall.

Mao ni silay kasagarang mobabag sa mga bagyo, dili lang ni Wilma, ning higayona sa tuig. Si Wilma nisuway sa pag-irog paingon sa kasadpan. Pero ang high-pressure wall niduso niya paingon sa habagatan. Mao ni rason nga gikan sa irog nga 10-15 ka kilometro kada oras hangtod sa Sabado sa kadlawon, si Wilma nagbaktas na lang gahapon sa buntag.

* * *

Gitiwasan pa gyod siya sa Amihan. Si Wilma morang gamay nga daob. Nga giyab-an og dakong balde sa bugnawng tubig. Wala siya mapawong pero wala sab siyang kasilaob.

Hinay na siyang daan isip tropical depression: 45 ka kilometro kada oras ra ang kinakusgan niyang hangin duol sa tunga-tunga; ug 55 ka kilometro ra kada oras ang iyang unos. Dili kahadlokan ang iyang hangin. Gikbalak-an nga makahatag og mas dakong kadaot ang iyang uwan.

* * *

Ang nahimutangan sa Sugbo sa tunga-tungang Kabisay-an maoy nakapandong niya gikan sa kinakusgang uwan. Nga labing abunda sa silangan nga bahin ni Wilma. Ang Sugbo nahimutang sa kasadpang bahin ni Wilma. Ug ang higanteng mga bungtod sa Leyte ug Samar maoy nakasagang sa uwan nga gikabalak-an nga moresulta sa pagbaha ug pagdahili sa yuta sa Central ug Northern Cebu kay natandog nang daan sa nangaging mga linog ug bagyo.

Pero labing uwahing paniid nagbutyag nga nihinay nang uwan ni Wilma. Matod ni Director Tabada dili na sama kadaghan ang uwan nga iyang ibubo inig paduol niya sa Sugbo. Kon makalusot na siya sa Amihan.

* * *