Tino mobalik?

Gawas sa pagtan-aw sa mga hulagway nga kuha sa mga kauban ko sa media, ug sa mga kugihan nga vloggers, gisuroy gyud nako ang kasapaan ug gisud-ong ang sitwasyon. Nakighinabi sab ko sa mga tawo nga nakakita sa baha.

Nakaingon ko nga dili tingali makiangayon kon ang nahitabong dakong baha ug paglunop ihan-ok nato ang pagbasol sa mga opisyal sa kagamhanan. Kapugngan ba gud nimo ang kusog kaayong uwan?

Sa wa pa ang Bagyong Tino, si Oscar Tabada, retired chief sa government weather bureau nga nagbase sa Mactan, daan na nga mipasidaan nga ang Bagyong Tino nagdala og uwan nga daghan ug tubig.

Ang kusog nga pagbunok sa uwan didto gibundak ni Tino sa kabukiran sa Sugbo ug miresulta kini sa kusog nga bul-og sa tubig-baha paingon sa ubos.

 Nahinabi nako ang kauban ko nga sakop sa media nga nagpuyo sa Barangay Paril. Didto siya sa bukid atol sa pag-igo sa Bagyong Tino ug sukad-masukad, kadto pa siya nakasinati nga milamwas ang tubig sa mga “sangi,” kanang gagmay’ng sapa-sapa sa ilang dapit. Ang tubig gikan sa Sangi dili na makalahos pagdagayday sa sapa kay miawas na man gani. Sayonan ka nga ang karaang taytayan nga puthaw sa Barangay Paril, gilapawan pa sa tubig ug gianod sa mapintas nga baha.

Nakaadto ko sa Barangay Paril ug sinati nako ang karaang tulay nga puthaw. Habog kaayo kini gikan sa kinaubsan sa sapa, apan atol sa Bagyong Tino, gilapawan pa ug mga duha ka metros ang tulay.

Ang sapa sa Paril adto kini mosangko sa Cotcot River. Hunahunaa lang, sa Paril pa lang daan, pwerteng dakoa na sa baha, samot na kon moipon na ang tubig ngadto sa Cotcot River.

Kini maoy rason nga ang tubig sa Cotcot River paingon sa Compostela misuyla ug dunay mga dapit nga ang gihabogon sa tubig sa sapa, miabot og duha ka dupa. Ang kabalayan nga daplin sa habog kaayong flood control nangaanod, sama diha sa Barangay Bacayan.

Usa ka building nga ihawanan og mga manok sa Compostela gihasmagan sa nagkabangis na nga tubig ug hinungdan nga daghan sa mga trabahador ang nangaanod ug nangamatay. 

Sa Mananga River mao sab, hilabihan ka dako sa baha. Gikan sa Cebu, ang Bagyong Tino mitabok sa Negros, ug ang Canlaon City nakasinati usab og grabeng baha ug lunop nga ang karsada nahimo na nga sapa.

Unya, angay ba nga pakasad-on na lang gyud nato ang mga opisyal? Para nako, “unfair” sab kay ang maong katalagman tungod kadto sa grabe kadaghang tubig nga gihuwad ni Tino.

Dunay komedya sa uban nga mobalik kuno si Tino, pero dili na mohimo’g kadaot, kondili, mangayo og pasaylo.