33,000 drug users sa Central Visayas napaubos sa rehab — PDEA7

CEBU, Philippines — Sa pagtimaan sa Drug Abuse Prevention and Control Week (DAPC) gihimug-atan sa Philippine Drug Enforcement Agency-7 ang Proclamation No. 124 s. 2001 nga nag-awhag sa mga institusyon, lokal nga kagamhanan, ug mga tunghaan sa pag-obserbar sa semana sa kampanya batok sa ilegal nga droga.

Si PDEA-7 Acting Assistant Regional Director Thessa Tiuzen miingon nga dako og papel ang Anti-Drug Abuse Councils (ADACs) sa matag syudad ug munisipyo, ilabi na sa pagpatuman sa community-based rehabilitation ug interbensyon sa mga migamit ug nagbaligya og droga sa komunidad.

 Sa barangay, ang Barangay Anti-Drug Abuse Council (BADAC), nga giatiman sa barangay chairperson, maoy sentro sa Barangay Drug Clearing operations.

Gipahibalo usab ni Tiuzen nga kapin sa 50,000 ka drug personalities ang na-monitor sa rehiyon ug 33,000 niini ang nakadawat og interbensyon sukad Oktubre 2025.

Ang interbensyon nagdepende sa klasipikasyon sa drug personality, Community-Based Rehabilitation Program para sa mga users ug Balay Silangan Program para sa mga pushers.

Matud niya kritikal ang papel sa ADACs aron masiguro nga ang mga gi-rehab dili na mobalik sa maong bisyo.

Usa sab kini sa mga gihimong sukdanan para ang mga LGUs hatagan og Seal for Good Governance.

Sa pikas bahin, tulo ka managsilingan ang gipaslak sa bilangguan human sila nakuhaan og ilegal nga drugas diha sa Purok Mahigugmaon, Barangay Tabunok, Dakbayan sa Talisay niadtong Miyerkules sa gabii.

Nadakpan sa buy bust operation si alyas Ering, 44, nga nibaligya og ilegal nga drugas sa poseur buyer nga polis. Apil sa nadakpan ang iyang mga silingan nga silang alyas Reymond, 35,  ug alyas Cleart, 28, nga naa sa iyang dapit ug nakuhaan og 10.35 gramos nga gidudahang shabu nga gibana-banang nibalor og P70,380. IBM BANAT NEWS