Quarry permittees sa probinsiya patamnon og kahoy

CEBU, Philippines — Hugot karon nga ipatuman sa Probinsiya sa Sugbo ang ordinansa nga nagmando sa quarry permittees nga mananom og kahoy sa matag metro kubiko nga minerales nga makubkob niini.

Si Gobernador Pamela Baricuatro niluwat og memorandum nga nagmando sa Provincial Environment and Natural Resources Office (PENRO) nga istriktong ipatuman ang section 3(c) sa Provincial Ordinance 2016-21 diin gisaysasy nga kinahanglang ang quarry permittees mananom og dili og usa ka punoan sa kahoy sa matag metro kubiko nga makawot niini nga minerales sa ilang host area ug silingang komunidad.

Kinahanglan usab nga modonar  kini og himsog nga endemic nga punoan sa prutas ngadto sa nurseries sa probinisya ug moestablisar og drainage canals sa mga site sulod sa durasyon sa ilang permit nga apil sa rekisitos alang sa re-issuance og permit.

Ang maong kamandoan subay kini sa tinguha ni Baricuatro nga malikayan ang grabeng pagbaha susama sa nahitabo sa pagkuso-kuso sa bagyong Tino diin ubay-ubay nga kinabuhi ang nakalas ug daghang balay ug kabtangan ang nangaguba.

Apil sa tinguha usab karon sa gobernador ang pagpatuman sa integrated water management system sa Sugbo.

Ubos sa Section 43 sa Akta Republika 7942 kun “Philippine Mining Act of 1995” ang mga probinsiya mamahimong makaluwat og quarry permits sa sites nga mosakop og lima ka ektarya.

Ang molapas sa maong gilapdon sa lugar adto na mangayo og permit sa Department of Environment and Natural Resources (DENR). BDB BANAT NEWS