Politika sa protesta

Gatosan ka libo ang misalmot sa unang adlaw sa lihok protesta sa Iglesia ni Cristo batok sa korapsiyon sugod kagahapon didto sa Quirino Grandstand. Ang protesta gipaabot nga moluntad hangtod sa Martes, Nobyembre 18.

Matud sa INC, ang kalihokan gitumong aron manawagan alang sa “transparency” , “accountability”, ug hustisya tungod sa grabing anomaliya sa flood control projects sa gobyerno.

Ang tigpamaba sa INC nga si Edwil Zabala miklaro nga dili pagpanghilabot sa politika ang ilang tumong kun dili pagpadangat sa kasuko sa publiko ug pagkondinar sa lapad nga pagpangawat sa kwarta sa mga magbubuhis.

Apan kinsay motuo nga way nagpahipi nga politika sa ilang protesta kun ang mga politiko nga alyado ni Bise Presidente Sara Duterte ug ang mga kanhi opisyal sa administrasyong Duterte ilang gitugotan nga mosalida?

Kun tinuod nga ang tuyo ug tumong lang sa protesta mao ang pagpadayag sa ilang kasuko tungod sa lapad nga anomaliya sa flood control, nganong naghitak ang mga placards nga nanawagan alang sa resignation ni Presidente Bongbong Marcos?

Angkunon man sa INC o dili apan tataw ang mga timailhan nga gigamit o nagpagamit sila sa politika. Wala say kridibilidad ang INC nga moingon nga dili sila manghilabot  sa politika ug pagpadayag ra gyud sa kasuko tungod sa korapsiyon ang ilang tuyo tungod kay sukad sa sinugdanan sa administrasyong Marcos dako sila og nahimong papel.

Nakalimot na ba ang INC nga ilang gisuportahan si Marcos sa miaging election taliwa sa daghang mga pahimangno nga way bayabas nga mamunga og mansanas?

Dili ba daghan man ang nagpahinumdom nganong dili angayang paluyohan si BBM atol sa piniliay niadtong 2022, apan nganong mas gipili sa INC nga siya maoy ilang iindorso?

Dili dautan ang pagpadayag sa kasagmuyo apan kun ang motibo mao ang paglumpag sa kagamhanan aron ipamugos ang ilang gusto sa paagi nga wala masubay sa batakang balaod dili kini makaayo sa kadaghanan.

Makadaot kini sa ekonomiya ug nag-imbitar og kagubot nga makapasamot sa atong kalisod.