Subo nga kamatuoran

Sa 27 ka tuig na nako sa panibya, unom ka tuig sa Bombo Radyo Cebu, Philippines, 18 ka tuig sa DySS Super Radyo Cebu sa GMA7 ug usa ka tuig ug upat ka buwan sa XFM Broadcasting Network wala gyod koy nakitang kausaban (kun basihan nato ang kausaban) nga maingon nato nga makapaminos kun dili man makapawagtang sa kalainan sa kabus ug adunahan kun hisgotan ang hustisya dinhi sa nasud.

Ang ka taas sa gintang sa kabus ug adunahan hayag kaayong nakita nato sa mga nalambigit sa krimen, madagko man o magagmay.

Ang ultimo ug yano nga nangawat og sardinas i sinsilyo dili na pangotanon nganong nangawat siya. Diretso na siyang dadon sa polis ug sultian nga sa presinto ka na magpaliwanag. Sa walay paglangay, pasakaan dayon siya og kaso sa piskaliya dayon ngadto sa hukmanan

Pero kun ang dato ug gamhanan nga  nangawat dili lang minilyon kun dili binilyon sa panudlanan sa nasud lisod gani nga iapil ang pangalan niini sa imbestigasyon ug kun maapil man himoon pa kini nga testigo pabor sa Estado ug kun dili man, pabakasyonon kini didto sa gawas sa nasud.

Kun ang kabus nakahimo og krimin ipaslak dayon kini sa prisohan ug daghan ang idili niini.  Pero kun ang adunahan makahimo og krimin magpa house arrest kini o mokalit lang sa pagkamasakiton. Magbutang dayon og laki-laki sa liog, magpakiang-kiang ug magpaluya-luya aron magpa hospital arrest.

Ang kabus kun mamaligya og pila ka pakiting drugas aduna dayon probable cause nga makita ang piskaliya ug makonbikto sa hukmanan ang kabus nga akusado ug serbisyohan og taas nga katuigan sa prisohan ang krimin nga gikalambigitan. Pero kun ang adunahan ug gamhanan ang malambigit sa gidili bga drugas busan pa tonelada nga gidili nga drugas ang nakuha gikan kaniya absuwelto siya ug inosente sama sa anak ni Justice Secretary ug karon Ombudsman Crispin Remulla.

Sa Pilipinas compartmentalize ang hustisya. Lahi ang hustisya sa dato ug gamhanan ug lahi pod ang para sa kabus ug timawa. Pero awhagon ko gihapon kamo sa pagsalig sa atong hustisya ayaw lang laum.