EDITORYAL - Di ordinaryong korte ang ICC

Wala tuguti sa International Criminal Court ang hangyo sa kampo ni kanhi presidente Rodrigo Duterte nga interim release ngadto ra pud sa third country mo modawat kaniya bisan pa man sa pasalig sa iyang mga abogado nga dili kini moikyas ug moatubang kini sa husay sa kasong crime against humanity nga iyang giatubang.

Ang depensa pinangulohan ni Nicholas Kaufman kinsa usa ka international lawyer ug ICC defense counsel nagtinguha untang mahatagan si Duterte og interim release ubos sa kondisyon nga dili kini mopauli sa Pilipinas ug kung dunay nasud nga modawat kaniya isip host samtang gipaminaw ang iyang kaso.

Apil sa iyang pasalig nga butangan si Duterte og electronic monitoring device aron makita bisan asa pa siya moadto.

Sa nanglabay nga mga semana daw dunay tsansa nga matugotan si Duterte sa iyang hangyo, ilabi na nga dunay mga nanggawas nga estorya gikan mismo sa iyang kampo nga huyang na ang iyang panglawas ug gani naabtan kini sa iyang selda nga walay panimuot.

Apan niadtong nakalabay nga adlaw, gipagawas sa ICC ang desisyon nga nagbasura sa maong hangyo. Ang ICC nagkanayon nga dili sila makasalig nga tumanon ni Duterte ang iyang saad nga dili moikyas ug dili likayan ang husay sa iyang giatubang mga kaso.

Tungod sab kini sa mga gipamahayag sa iyang mga anak , usa niini si Bise Presidente Sara Duterte sa publiko atol sa mga interbyu, mga rally, protesta ug uban pa nga sukwahi kaayo sa giandam nga pasalig sa ilang abogadong si Kaufman.

Usa pa, basi sa kakusog sa impluwensiya ug sa mga posisyon sa gobiyerno nga naa ang mga anak niini lakip na ang pagkadaug gihapon niya pagkamayor sa Davao City, apil sab ang iyang mga pamahayag atol sa kampanya niya nga “doblehon” pa niya ang gidaghanon sa mapatay nga mga kriminal, ang ICC mi-deny sa iyang hangyo.

Ang ICC dili ordinaryong korte kumparar sa ubang mga korte sa nagkalain-laing mga nasud lakip na ang sa Pilipinas. Kay kung parehas ra kini ubang mga korte hagbay ra kining gibungkag kaniadto pa.