Buong mundo nililinlang ng Communist China
HINDI lang sa Pilipinas may mga pro-China vloggers/influencers. Pati sa America at iba pang bansa ay may local na propagandista ang China Communist Party.
Napansin ‘yan ni sociology Prof. Alvin Camba, PhD, ng Johns Hopkins University. Pandaigdigan ang pambubusabos ng China. Kaya pangdaigdigan din ang pagkubli ng CCP dito.
Isang malaking kabulaanan ng China ay kesyo mas maunlad na raw ang ekonomiya nila kaysa America. At kesyo lamang na raw sila sa America sa larangan ng artificial intelligence, space technology, at militar.
Kinakalat ng China ang kabulaanang ‘yon para takutin ang iba’t ibang bansa. Kesyo malilintikan daw ang mundo ku’ng makadigmaan sila.
Ganyan din ang propaganda nila sa Pilipinas. Huwag daw lumaban sa China maski inaagaw ang mga bahura at isda natin kasi maliit na bansa lang naman tayo.
Ikalawang propaganda ng China ang paratang na ginugulo ng Amerika ang mundo. Hinihikayat ng CCP na maki-anib sa kanila ang mahihinang bansa ng Africa, South America, at Asia para labanan ang America. Pero palihim na sinusuhulan ng China ang mga pinuno ng mahihinang bansa para mapailalim sa impluwensya ng CCP.
Pinalalabas ng China na matinong bansa sila, hindi tulad ng mapagkamkam na America. Pero sa totoo, inaagaw din nila ang karagatan ng maliliit na bansa sa West Africa, Indian Ocean, at Pacific. Pinapasok nila ang exclusive economic zones ng Ecuador, Palau, Indonesia, Malaysia, Vietnam, Brunei, Taiwan.
CCP ang salot sa mundo. Pabagsakin sana ng mamamayang China.
- Latest
