Kasaligan sa ginagmay ug dinagko

Karong Dominggoha daghang mga dapit sa atong nasud ang mopasiugda og lakaw panaw batok sa korupsiyon nga naglambigit sa mga anomalosong mga proyekto ilawom kun ubos sa mga tigdumala sa atong nsud. Niabot na ang panahon diin ang atong mga katagilungsod nangayo na og singil kun kwentas claras gikan sa atong mga gisaligan sa kaban sa nasud. Kun diha sa mga ginagmay nga mga kantidad dili sila kasaligan unsaon na lang ang dinagkong mga kantidad. Ang atong kasinatian nagtudlo nato sa ingon nga kini na gyud ang nahitabo. Nagmata na lang kita og morning ning maong iring iring.

Kitang tanan mga piniyalan lamang sa Ginoo sa bisan unsa nga atong nahuptan lakip na gani ang atong kinabuhi. Kay piniyalan lamang nan, dili kita ang tag-iya. Nagpasabot kini nga ang tinuod nga tag-iya mangayo kanato og husay sa mga butang ug mga gasa nga atong nahuptan. Kining maong pagpangayo og husay atong atubangon dili man gani karon apan sa adlaw sa paghukom.

Sa maong adlaw sa panghukom dili ang Dios mangutana kanato kun nagmalampuson ba kita sa atong mga laraw sa kinabuhi hinunoa, mangutana siya kun giunsa nato paggamit ang mga gasa ug panalangin nga iyang gipahilumanan kanato. Ang atong pagkamabungahon makita dili sa atong gipanulti ug gilaraw kondili makita diha sa atong mga binuhatan.

Sa laing bahin, dili unta nato himoong babag ang atong mga bahandi nga materyal sa atong pakigsuod sa Ginoo. Mahinungdanon kaluwasan ug pakighigala kaysa bahandi.

Busa atong gamiton ang bahandi diha s paghigugma sa Dios ug sa atong isigkatawo. Gamiton nato ang bahandi higugmaon nato ang tawo, dili kay higugmaon nato ang bahandi apan gamiton nato ang tawo.