EDITORYAL — Bayolenteng kabataan

Makaalarma na kaayo kining mga bayolenteng mga insidente nga nalambigit ang mga menor de edad dinhi sa katilingban. Rason nga daghang mga tawo ang gustong pakubsan pa ang edad sa mga batang pwede ng prisuhon sa tinguhang sila patagmon.

Didto sa lungsod sa Borbon, usa ka 14-anyos nga dalagita ang matud pa gitabangan og kulata ug namatay kini. Wala pay klaro sa imbestigasyon kun si kinsa ang naghimo ani ug unsa ilang motibo.

Dili lang kini, naay daghan ug gani nag viral pa gani sa social media ang mga videos nga nagpakita sa ilang bayolenteng binuhatana.

Apan sagad sa mga nalambigit og mga ingon niining mga kagubot, mga menor de edad nga nagapil-apil og mga gangs. Mga kabataang pinasagdan sa mga ginikanan unya makaamong sa ubang nagtinarong.

Sakit kaayo para sa mga ginikanan nga ang ilang mga anak nabiktima aning mga pinasagdan, mao nga dili sab mabasol.

Ang Pilipinas adunay balaod nga hugot nga nagprotektar sa atong kabataan ang Republic Act 7610 o  Republic Act 7610 Special Protection of Children Against Child Abuse, Exploitation and Discrimination Act nga giamendahan na karon sa RA 9231.

Protektaran sila gikan sa tanang matang sa abuso, eksploytasyon ug diskriminasyon apil na niini ang gitawag og "worst forms of child labor."

Apan kaning balaora ang gibasol sa pipila nga wala makasabot o makatuhop sa tumong niini. Gipasangil nila nga kini ang hinungdan nganong daghan ng mga bata karon ang makahimo og mga krimen nga walay kahadlok.

Ang wala nila masabti dunay mga probisyon ning balaora kun unsay buhaton niadtong mga batang nakalapas sa balaod. Para nila, basta nakasala kinahanglan nang prisuhon.

Apan wala nila tan-awa kun nganong naingon niini ning mga bataa, di gustong dawaton nga biktima sab ni sila sa pagpabaya sa ilang mga ginikanan, usa ka matang sa abuso.

Daghang mga kabataang nalambigit sa krimen ang nasalbar tungod aning balaora ug nahimo na karong tarong nga sakop sa katilingban.

Kinahanglan lang tingali ang kooperasyon, disiplina, hustong pagmatuto ug pagtudlo ug pagpatuman sa mga curfew, edukasyon sa mga bata kung unsay dili ug kun unsay angay buhaton aron malikay sila sa mga kagubot.