Nakanindot sa demokrasya

Hilabihan nga politikanghong kaguliyang ang miresulta sa panghitabo sa Senado sa niaging semana. Kini dihang mibutho ang minoriya ug mi-elect kang Senador Win Gatchalian isip bag-ong Senate President Pro Tempore.

Nabahin ang katawhang Pilipinhon karon. Adunay misuporta sa quorum ug sa liderato ni Gatchalian. Subay kuno kini desisyon sa Korte Suprema sa kasong Avelino vs. Cuenco nga mipabor sa quorum.

Adunay habig usab ang mipadayag nga ilegal ang nahitabo sa Senado niadtong June 3, ilabina ang pag-elect kay Gatchalian isip bag-ong SPPT. Kini tungod kay wala niabot sa numero nga mo-constitute sa maong kausaban.

Gumikan niini, dakong debate ang nahitabo. Sa social media, ang gubot sa Senado ang nag-unang tema sa mga diskusyon sa tanang sektor sa katilingban, ma-professional man o yanong lungsoranon.

Sa laktod nga pagkasulti, nahimong daw law expert ang matag usa sa social media.

Ang uban mora’g abogado sa ilang pagtuhog sa isyu. Ang uban lupig pa gani kadtong nakaeskwela sa kursong abogasiya.

Matag post sa usa ka netizen sa kaguliyang sa Senado, adunay mo-comment dayon, pabor man o dili. Ug nahimong plataporma karon ang social media ug ubang matang sa komunikasyon sa pagpagawas sa ilang opinyon.

Hinuon, sa laing bahin, nindot kini nga kalamboan. Kay nagpakita lamang kini nga aware ang tanan sa mga politikanghong isyu sa ilang palibot. Ug nga willing silang mopadayag sa ilang mga sentimento.

Mao kini ang nakanindot sa demokrasya. Adunay kagawasan ang matag usa pagpagawas sa iyang kaugalingong opinyon sa unsa mang isyu nga naglambigit sa politika, sosyodad, relihiyon ug uban pa.