Unaha ang panglawas

Sa panahon karon gikinahanglan gyud kaayo ang health insurance. Bisan unsa nga insurance sa panglawas kinahanglan mag-invest gyud kay dako kaayo kini og ikatabang sa panahon nga manginahanglan na og repair ang atong lawas.

Tinuod gyud kini nga walay gipili ang edad kinahanglan a gyud nga dunay madangpan sa panahon sa panginahanglan.

Sa tinuod lang kanunay mataligm-an ang atong panglawas ug wala usab kitay tagad kong naa o wala kitay insurance maong magpangkapangka na ini’g mosurender na ang lawas nga gikinahanglan nga magpa-hospital.

Ok ra niadtong mga adunahan kay otomatik man nakaandam ang ilang minilyon nga kwarta. Apan sa mga alang alang ug kadtong kabus gyud makapamastilan nalang ta.

Duna koy natambongan nga tigom diin gihisgotan ang health insurance ug natuki ug napakita ang kamatuoran nga kanunay neglected ang atong kahimtang sa panglawas.

Sama nalang sa usa ka inahan nga OFW kinsa giuna pirme ang kaayohan sa pamilya ug sa samang higayon giatiman usab niya ang iyang health insurance kay simbako og dunay mahitabo sa iyang panglawas dili na maproblema ang iyang mga anak.

Nahitabo gyud ang iyang gikahadlokan kay na diagnose man siya nga dunay breast cancer ug gikinahanglan ang dakong kantidad alang sa iyang pagpatambal. Maayo nalang kay nakakuha siya og health insurance nga maoy nagamit sa iyang kombate batok sa cancer. Kong nahitabo pa nga wala siya insurance, dili lang siya ang maproblema kon dili labaw na ang iyang mga anak.

Usa lang kini sa realidad karon nga angayan hinuktokan nato. Kong nakakuha kita og mga sakyanan nga inutang ug uban pa nga galastohan nganong dili man nato magahinan ang kasegurohan sa atong kinabuhi nga mao ang pagkuha og medical insurance kay ini’g abot sa panahon dili na ta maproblema pa asa mangita og kwarta.

Kay sa tinuod lang ang kwarta ang makapalihok sa tambalanan aron atimanon ta.

Sa kahimtang sa panahon karon daghang balatian ang motakboy sa atong lawas, depende sa atong lifestyle.

Bisan og dili kita magbisyo o manigarilyo pero ang kauban nato sa balay o sa trabahoan manabako posible kitang mataptan og respiratory ilness o ba kaha cancer. Ug kong wala kay kwarta ug wala pa gyuy medical insurance mamahimong sama sa sigarilyo nga maupos nalang.

Mao kini ang hinungdan nga daghan ang maglinya sa mga radio stations nga magpatabang kay naay mga sakit kay wala man lagi nakapangandam. Kong makabinuwan og motor nganong dili makabinuwan og insurance? Bitaw bisan unsa ka baskog ang lawas moabot ra gyud ang panahon nga mapunder kini. Samtang wala pa moabot kining panahona mas maayo makapangandam na.