Himsog nga pangisip tutokan

Ang isyu sa mental ilness o suliran nga adunay kalambigitan sa pangisip ang kanunay nataligam-an o wala mahatagi og pagtagad sa kagamhanan.

Tataw kaayo kini nga suliran sa atong katilingban pero subo palandungon nga na-take for granted kini sa kinabag-an.

Kanang maglakaw ka kadalanan duna gyuy kay makit-an nga mga tawong nawala sa ilang kaugalingon apan gipasagdan lang nga murag kabahin na sa adlaw adlaw nga talan-awon.

Duna bay naggahin kanila og panahon aron masayran ang tinuod nga panghitabo sa ilang kinabuhi nga maoy hinungdan sa pagkawagtang sa tarong nila nga paminsar? Sa tinuod lang wala kay lagi naka focus sa ubang mga isyu.

Kong maghisgot kita og isyu nga medikal, dili gyud gani mahisgotan ang mental illness, ayha ra seguro kong dunay espesyal nga okasyon alang niining isyuha.

Karon, ang isyu sa mental health matutokan na gyud kay mao kini ang prioridad sa Committee on Health sa konseho sa dakbayan sa Sugbo nga gipangulohan ni Councilor Michelle Abella Cellona kinsa akong nainterview niadtong nakalabay'ng semana.

Magamit sa konsehala ang iyang expertise sa pag-amuma sa mga tawo nga adunay problema sa pangisip. Akong lakbitan lang gamay, batchmate nako si Konsehal Michelle sa College of Arts and Sciences sa USJ-R ug niadtong panahona maayo na gyud daan og record kong performance ang hisgotan.

Busa kampante ko nga mahimo niya kini nga naa na siya sa serbisyo publiko.

Nakig-alayon ang iyang komite sa kabaranggayan aron maggahin og mga tawo nga kadangpan sa mga molupyo sa higayon nga adunay magkinahanglan og tabang.

Dili kang basta basta nga tabang sanglit ipaubos man ang mga baranggay frontliners sa training sa insaktong pag atiman sa mga tawo nga nakasinati og mga bug-at nga suliran sa kinabuhi nga posibleng mosangpot sa mas grabe pa nga suliran.

Gawas sa barangay, makig-alayon usab sila sa mga simbahan isip partner sa programa nga makahatag og spiritual intervention sa mga tawo nga dunay gipas-an nga dakong suliran.

Kong dinagko na gyud gitap usab ang mga mental health professionals nga mosusi ug motambal sa mga pasyente. 24/7 ang ilang serbisyo kong dunay magpatabang ila gyud nga atimanon.

Wholistic approach ug systematic ang ilang pagpadagan sa programa aron matabangan ang mga nagkaproblema hangtud hingpit nga masulbad ug ma-reintegrate sa komunidad ang mga mentally ill patients kong hingpit na silang mamaayo sa balatian.

Maayo ang programa nga pagtutok sa paminsar kay sa utok sa mga tawo nakadepende ang pagabuhaton, kong himsog ang pangutok maayo usab ang pag function niini sa katilingban busa angayan lang nga gihatagan kini og pagtagad. Unta ang ubang LGU mohimo usab niini.

Dili lang pud ang mga naglingkod sa gobiyerno kon dili kitang tanan ang magkahiusa sa pagpakabana sa issue sa mental ilness pinaagi sa pagsabot sa sitwasyon sa mga tawong natungnan niini ug makig-alayon sa mga experto alang dinalian nga intervention aron mamahimong kaposlan pa sila sa atong katilingban.