Baste gimansahan maayong imahe sa mga Duterte

Dili g'yud mahibaw-an ang tawo. Nagtuo kang tungod kay iyang punoan saging ug mamungag mga tam-is saging, apan dili diay tanan maoy mahitabo sa unsay imong gituohan.

Kay usahay sa usa ka sipi-bulig, may nasagol nga kinitkitag kuwaknit, o sa ilang pagkahinog anaa g'yuy masukwahi.

Ug mao kini ang nahitabo ni acting Davao City Mayor Sebastian ‘Baste’ Z. Duterte kang kansang amahan, kanhi Presidente Rodrigo Duterte (PRRD) ug mga anak sama nila Bise Presidente Sara ‘Inday’ Z. Duterte ug Kongresista Paolo ‘Polong’ Z. Duterte namatud-an nang pulos isog, walay giatrasan nga mga berdugo diha sa ilang pagpakig-away sa natad sa politika.  Apan niining bag-o, diin gihagad ni Baste si PNP Chief Nicolas Torre III og sinukmagay, akoy unang nabungog sa maong masuk-anon niyang hagit dihang human kini dawata ug pangandami ni Torre, kalit lang miatras ang kinamanghorang anak sa unang asawa ni PRRD, kinsa isog lang diay sa sulti ug wala sa buhat.

Ang paghatag og kondisiyon ni Baste, nga madayon ra ang ilang away ni Torre kon magpa-follicle hair drug test ang tibuok pamilyang Marcos, tanang senador ug kongresista-public servants ug ang pagpamahayag nga ang adlawng Domingo, Hulyo, 27, 2025, ilang away ni Torre, naaprobahan na sa miaging bulan pa lang sa DILG ang iyang request leave to travel, hinungdan nga dili siya makatunga, diin dili na unta angay isulti ni Baste. Kay kini timaan, sa indirekta niyang pagpanalaw.

Unta, kapito ka kapitoan ka pito ka pilopilo ang paghunahuna ni Baste kon ang mga hait niyang mga pulong dili ba makasamad sa kasingkasing sa iyang isig ka ingon, ayha pa kini gipagawas sa iyang baba?  Dili unta mahibaw-an asang dapita, siya huyang?

Tan-awa, unsay nahitabo? Nahimo na hinuon siyang maot! Ug mapunit pa ba niya ang iyang nalabay ngadto sa halawom dagat nga dili matugkad? Buwahan, puniton-haw-ason kini ug tunlon niyag balik?

Kaanugon sa maayong imahe nga gitukod ni PRRD ug gisunod sa tanan niyang anak, diin si Baste ray miunay sa pagguba! Sa bagay, sa mga anak aduna gyoy black sheep. Ug walay tawong dili masayop! Mapangitaan pa kahag paagi ni Baste, nga kini malimpiyohan? Na hala, Baste, paningkamot!