Hilom nga legasiya ni Junjun

Dili pirme magsaba ang tinud-anay nga pagpangulo ngadto sa katawhan. Usahay makita kini diha sa hilom apan puno sa kadalaygon niyang panerbisyo, ug labaw sa tanan, diha mismo sulod sa iyang kasingkasing. Diin, wala niya kinahanglana ang media nga magsunodsunod niya ug moanunsiyo kutob sa unsay mga dagkong proyekto nga nahimo ug napuslan sa katawhan

Ania ang natagong legasiya ni Hilario “Junjun” Davide III, isip Gobernador sa Sugbo (2013-2019) ug Bise Gobernador (2019-2025): Naila si Junjun sa iyang pagka-very good servant. Wala siya mamuno pinaagi sa pagpasikat gamit ang nahuptan niyang gahom, kundili pinaagi sa pagrespeto kanunay sa katungod sa katawhan ug sa mga lehitimong proseso sa balaod nga agian kada higayon nga aduna siyay mga bag-ong proyekto-programang tukoronon ug humanonon. Kaaway niya ang korapsiyon.

Panahon sa iyang pagpangulo, nakadawat ang Probinsya sa Sugbo og Seal of Good Local Governance (SGLG) award sa 2015, 2016, ug 2017. Kini usa ka bulawanong kalamposan diha sa malinis niyang pagpangalagad, diin zero ang korapsiyon. Hinungdan, may igong pundo pinansiyal ang Kapitolyo nga ikasugakod sa paggasto alang sa mga social-cultural-crucial events or panahon sa paghasmag sa mga mangtas nga katalagman.

Gawas sa awards nadawat, mas gipaka-bililhon ni Junjun ang naangkong mga pasalamat gikan sa katawhan. Kadtong iyang mga natabangan, nabisita, ug natambalan sa mga higayon nga nagkapangkapangka intawon ang nahisgotang mga kabos niining maong matang sa ilang panginahanglan.

Hilom man tuod siya molihok, pero kining samaritanhon niyang mga buhat, naglanoglanog sa mga kasingkasing nga iyang gitandog, gigiyahan aron gikan sa pagkahagba makabarog pag-usab. Usa sa mga giuna ni Junjun mao ang sektor sa kahimsog. Diin, ang ginadamgong zero billing nahimog tinuod. Libre ang laboratoriyo ug libre ang operasiyon.

Unya dihang bise gobernador na lang si Junjun, wala siya mosupak sa bisan unsang direksiyon sa administrasiyon. Kanunay siyang nagsuporta, nag-alagad uban sa Sangguniang Panlalawigan ug sa mga board members nga puno sa panaghiusa. Wala siya moapil sa politika nga puno sa panagbangi. Padayon ang iyang pagpangalagad subay ang kalinaw sa panghunahuna ug pagkamapahiubsanon.

Salamat, Vice-Gov. Junjun, sa pagpamunong walay panghambog, apan kinasingkasing. Nahinumdom ang katawhan. Nakakita ang Sugbo. Ug bisan sa kalawom nga kahilom, nagpadayon ang imong legasiya!