EDITORYAL - Partido ug ambisyon

Paugatay. Mao ni ang sitwasyon karon nga naa ang Upper Chamber o Senado dinhi sa Pilipinas karon. Paugatay ang mga senador sa kung kinsay unang mobahar.

Para sa ilang kaugalingong pagtan-aw, silay sakto. Mao na nga hangtud karon walay trabahong nahimo ang mga senador para sa kaayohan sa tanang mga Pilipino ug sa nasud.

Ang ugat ani, mao ang politika, ang ilang loyalty sa ilang politikanhong partido ug dili para sa mga tawo. Dili na katuohan ang ilang mga pamahayag nga para sa katawhan ang ilang gibuhat kondili para sa ilang personal nga interes ug personal nga ambisyon.

Ang  kanhi unang presidente sa republika nga si Manuel L. Quezon kaniadto sa iyang pamahayag nagkanayon "My loyalty to my party ends where my loyalty to my country begins."

Karon dunay ang mga senador nga nagpabiling nagpahigot sa ilang partido  ug nagpakaaron-ingnon nga para sa katawhan ang ilang baruganan bisan nakalapas na sa balaod , apan ang tinuod, nag-apas lang sa ilang personal nga interes, ilabi na sa ilang ambisyon karong umaabot nga piniliay sa 2028.

Imbes nga protektahan ang interes sa nasud ug sa tanang mga Pilipino, ang interes sa ilang partido ug mga kaugalingong ambisyon maoy gipatigbabaw.

Si kinsa gud sa kasamtangang mga senador ang dunay purohang makadaog sa pagka-presidente? Naa bay usa nila nga angayang piliong presidente sa 2028? Kaning nahitabong pagpaugatay sa mga senador, imbes nga mosunod sa Senate Rules ug sa mga nasabutang mga patakaran, bunga ni sa pagtabon-tabon sa mga kahiwian nga ilang nahimo nga dili nila gustong masabwag ug mahibaw-an sa publiko. Nahadlok silang kung mawagtang sila sa posisyon ug wala nay gahum, paninglon sila sa katawhan.

Pero naa gihapoy sayop ang pipila ka hut-ong sa katawhan aning mga nahitabo karon. Tungod ni sa ilang pagpakabuta-bungol sa tinuoray nga mga nahitabo ug sila mismo gustong tabunan ang mga kasaypanan sa ilang mga gisuportahang mga politiko.

Mao nga makapangutana nalang ang uban kung makatarunganon ba ni para sa mga Pilipino  ang mga gipangbuhat sa mga lider karon?

Dinhi tanan nagsugod ang tanang matang sa kurapsyon kun ang usa ka lider nagpahigot gihapon sa ilang partido.