Kaangayan nakatatak sa iyang pagpanaktak

Mibag-o na ang nawong sa Kapitolyo, Probibnsiya sa Sugbo. Gikan sa kabug-at-makabughat nga hitsura, hinayhinay nang napulihan ug kagaan-kapamahiyomon diha sa iyang unang mga adlaw sa pagpangalagad sa katawhan.

Sa makausa pa, gipakita ni Cebu Governor Pamela ‘Pam’ S. Baricuatro nga ang Kapitolyo iyaha sa katawhan ug ang nakalingkod nga gobernador usa ka People’s governor, kinsa andam mangalagad sa tanan, isp usa ka suloguon. Ug dili sama sa usa ka haring rayna nga maoy ampoan ug alagaran sa iyang mga ulipon.

Kini tungod kay gipahibalo ni Gov. Pam ang publiko, nga dili dayon niya tangtangon sa puwesto ang mga job order (JO), kinsa gihatagag trabaho sa miaging administrasiyon ug nakaalagad sa Kapitolyo sulod sa taastaas panahon.

Mogahin siyag tulo ka bulan alang sa kinaugalingong pag-obserbar, diin makita niya mismo, kinsa sa mga JO ang kugihan-maayo-buotan ug kinsa ang ligoy-taspokan-intregira? Busa, aduna na siyay igo ug patas nga tuburan, kinsa kanila ang iyang ibilin ug kinsay angayang pangtaktakon?

Sanglit, anugon kaayo niadtong naningkamot sa pagbinuotang JO, diin sa iyang pagbinuotan, palayason ra man diay dihadiha dayon, imbes premyohan og usa ka regular nga posisiyon. Labi nag ang maong JO pamilyado ug daghang anak ang gibuhi, maayo gyong tabangan aron mahimong inspirasiyon sa uban. Nungkang, kulban hinuog kaldero!

Pero kadtong JO nga may rekord nang motunga rag petsa 15 ug kataposan sa bulan? Ay, paphaon gilayon. Kay iya mang tinuyoan!

Kahinumdoman. Bisag wala pa pormal nakalingkod si Gob. Pam, pinaagi sa media interviews, namahayag na siya, nga kon unsa man mga naandang proyekto’g gimbuhaton sa Kapitolyo nga gibilin sa gipulihan niyang gobernador, kon kini nakahatag og kaayohan sa probinsiya’g katawhan, iyaha kining ipadayon. Pero kadtong mga bulok, iya gyong tangtangon-ibasura!

Sama, nga kon kinsa mang empleyadoha sa Kapitolyo (ultimo man o opisyal) ang nagpondar og good performance alang sa pagpalambo sa kalungsoran ug nakatabang paghatod og solusiyon sa  mga nanginahanglan, sila magpabilin sa ilang puwesto.

Mao kini ang matang sa taras nga anaa si Gob. Pam. Nga bisan sa mga JO, nagmatngon siyang walay maligsan-maagrabiyado sa iyang paghukom – ang kapatas-kamakaangayon diha sa iya unyang pagpanaktak og empleyado, diin ilahang actual performance gyoy iyang basehan.