Pahimulos sa mga kompanya sa lana

Mipaubos sa presyo sa ilang mga ptoduktong petrolyo ang mga kompanya sa lana epektibo alas 6:00 sa buntag karong adlawa. Kapin sa piso ang giminus sa ilang prisyo.

Ang rason sa pagubos sa presyo mao ang pahibawo ni US President  Donald Trump sa posibling paghunong sa gubat sa israel ug Iran backed up nga Hamas.

Ambot og malipay ba kamo sa pag ubos sa presyo sa mga produktong petrolyo nga sa atong pagsabot ulog-ulog man lang kini kanato sa mga kompanya sa lana.

Sa duha lang ka semana ang presyo sa mga produktong petrolyo miumento og sobra na sa napulo ka pesos unya us-usan lang nila og piso ngadto sa dos pesos? Ulog-ulog.

Dili ang pahibawo ni President Trump sa Amerika nga moundang na ang Israel ug Iran sa ilang gubat ang nagpaubos sa presyo sa produktong petrolyo kun dili ang pamahayag ni Presidente Bongbong Marcos Jr. nga bantayan ang pagpasaka sa presyo sa produktong petrolyo tungod kay daghan kompanya sa lana nga mipaumento sa ilang presyo bisan og walay epekto pag umento sa presyo sa lana sa merkado sa kalibotan  tungod kay usa lamang kaadlaw ang pagsaka niini kay mibalik dayon kini sa pagubos pagkasunod adlaw.

Hagit nako sa administrasyong Marcos ang paglutos sa mga kompanya sa lana nga nagpahimulos sa gubat sa Israel ug Iran pinaagi sa pag gamit niining rason aron mopasaka sa prisyo sa ilang produktong petrolyo.

Hangtod dili madisiplina sa gobiyerno ang mga mapahimuslanon nga kompanya sa lana padayon sila nga mopahimulos sa gubat alang sa pagpaburot sa ilang ginansiya.