Pahimatngon ni Archival
Salamat sa pataka sa niaging tulo ka administrasyon, dako ang mga problema sa Cebu City nga sagubangon nilang Mayor-elect Nestor Archival ug Vice Mayor-elect Tommy Osmeña. Mosamot kabug-at ang ilang trabaho kon dili magkahiusa. Makahasol ang implikasyon sa mosunod nga mga insidente:
• Gipasanginlan sa urban poor groups ug Carbon vendors si Archival nga nagbudhi nila sa iyang pagbiya atol sa botasyon sa City Council sa kausaban sa zoning ordinance niadtong Miyerkules; ug
• Gi-imbitar ni Osmeña ang Carbon vendors sa entablado atol sa iyang pagpanumpa sa Plaza Sugbo gahapon sa buntag.
* * *
Napugos si Archival pagdagan pagka mayor tungod sa pasalig ni Osmeña nga bisan sa edad motabang siya isip bise mayor. Atol sa kampanya, gisultihan ni Osmeña ang mga botante nga molingkod lang siya pagka bise mayor kon si Archival ang ilang pilion pagka mayor.
Walay nagpaabot sa ilang kadaogan sa Mayo 12. Kay wala ra sa kumingking ang ilang partido sa mas lig-ong mga makinarya nilang outgoing Mayor Raymond Garcia nga gisuportahan ni Presidente Ferdinand Marcos Jr. ug kanhi Mayor Mike Rama nga gisuportahan ni kanhi Presidente Rodrigo Duterte.
* * *
Dihang naproklamar silang Arhival ug Osmeña, lunsay ang kalipay sa mayoriya. Naglaom sila nga, sa kataposan, duna nay takos nga tagdumala sa City Hall human nasaag ug na-bangkarota sa niaging unom ka tuig.
Masaligon ang mga Sugboanon nga tungod sa taas nga kasinatian nilang Archival (sa iyang pagka konsehal ug pagka negosyante) ug Osmeña (sa iyang pagtukod sa South Road Properties), mas dako ang kahigayonan nga masulbad ang mga problema sa baha, basura ug panginabuhi.
* * *
Nabalaka ko nga karong nidaog na nahasol si Archival sa mga intriga nga mahimo ra siyang itoy ni Osmeña kon igo lang moyango sa bisan unsay isugo niya. Kon suguon siyang Osmeña paglayat sa pangpang ug pagluok sa interes sa mga Sugbo, mopakpak ang mga Sugbuanon kon mosukwahi siya.
Pero dili kinahanglan nga motan-aw sa layo si Archival kon nagplano siya sa pagsupak ni Osmeña aron lang pagmatuod nga siya nay bag-ong hawod sa City Hall. Imbitahon namo siya sa pagsusi unsay nahitabo sa syudad ubos nilang kanhi Mayor Alvin Garcia ug sa iyang kumpare nga si Mike Rama.
- Latest
