RA 6713: Gi-buhi ni Borgonia!

Sa panahon nga daghan ang isyu sa pondo ug hustisya sa serbisyo publiko, angay nato balik-balikon ang Republic Act 6713, o ang Code of Conduct and Ethical Standards for Public Officials and Employees.

Niadtong Mayo 26, sa 16th Provincial Board (PB) session, mitindog si Board Member Jiembo Borgonia. Nangutana siya ngano gidali ang pag-apruba sa P1.2 bilyon nga supplemental budget bisan hapit na matapos ang termino sa gobernador.

Para niya, mas maayong ang bag-ong administrasyon ang motan-aw ug mo-aproba aron malikayan ang duda ug masiguro ang limpyo nga proseso.

Wala siya mangdaut. Wala siya manginsulto. Klaro ang tumong: pagbantay sa public trust ug pagtuman sa etikal nga pamatasan nga gipasabot sa RA 6713.

Ang balaod nagsulti nga ang tanang opisyal kinahanglan matinud-anon, responsable, ug masaligan. Dili para sa kaugalingong interes, kundi para sa katawhan. Ug kini ang gibuhat ni Borgonia.

Wala siya mopabor, wala siya milikay.

Dili unta kahadlokan ang pagpangutana, labi na kon dako ang epekto sa katawhan.

Ang transparency ug ethics dili kalaban sa panaghiusa; kabahin kini sa tinuod nga leadership.

Ang lihok ni Borgonia dili batok sa administrasyon, kondili ehemplo sa prinsipyo ug moralidad. Ang ubang board members unta masangkit ug mapadasig sa mensahe sa RA 6713: trabaho lang, walay personalan.

Karong panahona sa transition, atong hinumduman ang katungdanan dili ganti kundi responsibilidad. Ang RA 6713 dili lang balaod kundi giya sa pamatasan, paminsar, ug pagbati sa tinuod nga public servant.

Salamat, Board Jiembo, sa pagbuhi sa tinuod nga kahulugan sa RA 6713.