Ang pag-Ampo usa man ka paghigugma

Basaha: 1 Cor. 6;19-20

Matud pa ni Santa Teresa de Avila: “Mahinungdanon ang maghunahuna apan mas mahinungdanon gyud ang mahigugma!” Ang pag-ampo ganghaan aron masinati nato ang Dios apan sa laing bahin ang maong pag-ampo atong sabton ingon nga paagi sa pagpadayag sa atong dakong gugma.

Dili lang kini mahitungod sa paghunahuna og maayo mahitungod sa Dios ni ang pagtagamtam sa nindot nga pagbati kun anaa kita sa kahimtang sa pag-ampo. Hinunoa buot lang nato nga mahimong “ANAA kuyog sa DIOS” nga atong gihigugma. Nahimong gihatag nato ang tanan natong galamhan, panahon ug kaugalingon aron mapuno kita sa presensiya sa Dios nga mahimong atong ikahinabi diha sa kahilom.

Wala nato hunahunaa ang bisan unsang kasaba sa sulod man o sa gawas. Tungod kay anaa man kita sa taliwala ug ang presensiya sa Dios nhupong kanato sa hilabihan.

Ang Dios wala lang sa atong hunahuna kondili sa atong kasingkasing. Ang Dios anaa man sa atong kasingkasing, ang sentro sa atong pagkatawo. Mas mahinungdanon ang pagpaminaw kaysa pagpangayo. Mas mahinungdanon ang pagpaabot kaysa pag-una. (Butang nga malisud gyud himoon sa kadaghanan kanato). Kini tungod kay sa atong disiplina gihunahuna nato ang atong kaugalingon lamang ug dili ang uban.

Pag-ampo

Langitnong Amahan, gipangita ko ang imong presensiya sa tanang mga yugto sa akong kinabuhi.

Itugot nga ang imong Espiritu Santo maggiya kanako sama ni Pedro nga nibarog diha sa imong kamatuoran.

Pun-a ang akong kasingkasing sa imong kusog ug kalig-on. Hatagi ako sa imong kaalam aron akong mapaambit sa uban.

Mobarog unta ako diha sa imong atubangan uban ang pagtuo, masaligon sa imong mga saad, ug mahupay sa imong gugma. Ikaw nga buhi ug hari hangtud sa kahangturan. Amen.