EDITORYAL - Hulihin nasa likod ng kidnapping
MAWAWALA lamang ang nadaramang takot ng mga negosyanteng Pilipino-Chinese kung mahuhuli ng Philippine National Police (PNP) sa lalong madaling panahon ang “utak” at mga nagsagawa ng pagpatay sa negosyanteng si Anson Que at drayber nito na si Armanie Pabillo.
Natagpuan ang bangkay nina Que at Pabillo sa tabing kalsada sa Rodriguez, Rizal noong Miyerkules. Nakabalot sa plastic bag ang mga bangkay at naka-duct tape ang mga mukha. May mga galos at sugat sa katawan ang mga biktima na pinaniniwalaang pinahirapan muna bago pinatay. May mga bakas na binigti ang mga biktima na ikinamatay ng mga ito.
Ayon sa PNP, huling nakita ang sasakyan ni Que sa Macapagal Blvd. sa Pasay City noong Marso 29. Noong Abril 8, natagpuan ang inabandonang sasakyan sa Seminary Road, Bgy. Bahay Toro, Quezon City. Kinabukasan, Abril 9, natagpuan ang mga bangkay ng biktima sa Rodriguez, Rizal. Ayon pa sa pulisya, nagbayad ng P100 milyong ransom ang pamilya ni Que sa kidnappers.
Ayon kay PNP spokesperson Brig. Gen. Jean Fajardo isa sa sinisilip nila ay ang posibilidad na pagkakasangkot ng POGO investors sa pagkidnap at pagpatay kay Que. Ang POGO investors, ayon kay Fajardo ay nag-o-operate sa Pasay. Sinabi naman ng Presidential Anti-Organized Crime Commission (PAOCC) na marami pang POGO operators sa Pasay.
Noong nakaraang Pebrero, dinukot ang 14-anyos na Chinese student sa Parañaque City at saka pinutulan ng isang daliri. POGO rin ang nasa likod ng pagdukot sa estudyante. May pagkakautang umano ang ama ng estudyante sa POGO operator.
Noong nakaraang Enero 5, 2025, isang negosyante ang dinukot at natagpuang patay sa San Jose Del Monte, Bulacan. Dinukot ang 62-anyos na negosyante habang sakay ng kanyang Toyota Innova at patungo sa fish farm sa Calauan, Laguna. Ayon sa anak ng biktima, humihingi ng P100,000 ang mga kidnappers subalit P79,000 lamang ang naibigay nila.
Sunud-sunod ang pangingidnap at nakababahala ito. Ang mga nangyayaring pangingidnap ay halos katulad ng mga nangyari noon na pawang mga negosyanteng Chinese ang target. Ang masakit, pinapatay sa kabila na nagbigay ng ransom.
Nararapat kumilos nang mabilis at tiyak ang PNP para mahuli ang nasa likod ng kidnapping. Kung POGO investors ang nasa likod ng kidnapping, pagtulung-tulungan para mapuksa ang mga ito. Kapag hindi naputol ang pangingidnap, matatakot ang mga dayuhang investors na magtayo ng negosyo sa bansa at ang resulta, dadapa ang ekonomiya.
- Latest
