Nag-iyahay ra sa pagpahigayon og unity walk ug peace covenant signing ang mga dapit uban ang ilang mga kandidtato nga magpapili sa umaabot nga eleksyon, naay sa mga lungsod ug syudad, naay sa lalawigan apan matinod-anon kaha silang tanan? Dili kaha kutob kang sa ceremonial o pakitang tao lang basta lang ingon nga nagkahiusa alang sa pagkab-ot og kalinaw sa umaabot nga eleksiyon?
Sa tinuod lang mao kini ang akong nasaksihan sa mga ingon niini nga kalihokan kay ang ubang mga kandidato wala gani motunga sa wala matino nga rason. Naay nitunga apan makita nato sa ilang mga nawong ang kaplastikan nga kon mainitan malanay, pastilan nalang gyud.
Anugon ang pagpaningkamot sa Comelec ug PNP ug ubang mga ahensiya nga magkahiusa unta ang tanang kandidato. Apan mora’g nahulog nga walay kapuslanan kay nag iyahay man lang og patas-anay sa garbo ang mga politiko, maayo ra mopahiyom kong maigo sa camera apan kong wala na tagsa ka kilo ang pagmug-ot sa nawong.
Dili unta i-take for granted ang ingon niini nga paningkamot sa Comelec ug PNP kay kining tanan alang sa pagseguro nga mapatuman ang kahapsay ug kalinaw. Basin nagsalig ang uban nga malinawon ang Central Visayas ilabi ba gyud ang Cebu nga anaa sa green category.
Pasalamat ta dinhi kay wala nato masinati ang kainit sa sitwasyon sa ubang mga dapit sa Mindanao nga nagsugod na sa pagbanaw ang dugo tungod sa hugot nga panagtigi sa politika. Napagan pa ang election officer sa Datu Odin Sinsuat sa Maguindanao kinsa namatay kauban iyang bana human gibanhigan patay ang ilang gisakyan sa mga armadong lalaki.
Didto kinabuhi gyud ang bugti sa kahakog sa gahum. Hinuon mas swerte kita dri sa Kabisay-an ilabi na sa Sugbo nga kutob lang sa plastikay ang tanan walay kurat, kong mag away man kutob lang sa baba. Unta ingon ani lang ka gamay ang masugatan nga hagit babaay ra kutob walay balahay kay seguradong gubot gyud ang ang sangpotanan.
Samtang karong adlawa magsugod na ang kampanya sa mga lokal nga kandidato, opisyal nga pagsugod diay kay dugay naman ni silang nangampanya ug sa naandan manggawas ang kinadak-ang botbot nga maayo kaayo sa saad nga kalamboan apan dili diay matuman kong makalingkod na sa katunganan.
Ultimo tarp o campaign material placement wala gyud mosunod sa lagda sa Comelec, ang ingon niini ba nga public servant ang pilion nga number one sa pagkasinupakon. Kandidato oa gani unsa nalang kong makadaug o masublian sa katungdanan.
Ila-ilahon nato sa husto ang mga kandidato kay pulos na ra ba sila buotan karon maong makalibog labi na og naay pakapin nga kwarta dali ra kaayo hayloon ang mga botante nga mahimo nang ignorante kay nabayran naman. Unta duna pay ligdong nga kandidato alang sa ligdong nga mga botante kay duna pay paglaum sa katarong.