Diskriminasyon

Sa pagproklamar ni Presidente Bongbong Marcos Jr. sa iyang 12 ka mga kandidato sa pagka senador sa politikanhong rally nga ilang gipahigayon buot ipasabot sa Presidente nga ang iyang mga kandidato pulos dili basta-basta ug walay buling sa pagpapatay, pagpangawkaw ug pagpabor  ngadto sa China kalabot sa isyu sa West Philippine Sea.

Buot nga ipasabot sa Presidente nga ang iyang mga kandidato sa pagka senador wala lang niya pamunita sa dalan, dili pariha sa uban nga partido nga nakakita lang og namaligya og suka gihatagan o nakadala na og Certificate of Candidacy sa pagka senador.

Unsa diay naa sa namaligya o sa pagpamaligya og suka, Mr. President?

Buot ba nimong ipasabot nga dili puwede nga masenador ang mamaligya og suka?

Mas maayong balik-balikan sa Presidente o basahon sa Presidente ang kuwalipikasyon sa pagka senador.

Aduna lay lima ka kuwalipikasyon ang senador. Una, natural born citizen siya sa Pilipinas, 35 ang edad sa adlaw sa piniliay, makamao mosuwat ug mobasa, rehistradong botante ug nagpuyo sa Pilipinas duha ka tuig immediately sa dili pa ang gitakda nga piniliay.

Wala man mabutang dinhi nga dili ka puwede nga magsenador kun namaligya ka lang og suka.

Kay ngano man diay og namaligya og suka pero mas taas pa og kahibawo ug maayo ang mga plano kay sa mga kandidato sa Presidente, dili na gyod diay ma-senador?

Naa koy amigo niadto sa usa ka ahensiya sa gobiyerno nga nag negosyo og suka kay matud pa niya mao na kini ang iyang atimanon inig retiro niya sa katungdanan isip chief sa assessment. Nag-export na siya og suka sa wala pa siya moretiro. Sa commercial ad pa kaniadto sa usa ka bangko, pasuka-suka lang ni bay pero City Savings Bank kini.

Ang Presidente nga maoy magpatuman sa anti-discrimination nga balaud mao diay ang nag unang misupak niini?