Gustong magpa-umento sa sustento

Dear Atty. Divine,

Naa koy duha ka anak, nagpangidaron og 2 anyos ug 11 anyos. Nagbuwag na mi sa amahan aning akong 11 years old ug dili mi kasal ato niya. Naminyo nako karon aning amahan sa akong 2 anyos nga anak. Ang amahan aning 11 anyos nagsuporta apan 4 mil pesos lang matag buwan. Ang akong anak grade 6 na ug mag high school na sa sunod nga tig-abli sa klase. Akong gihangyo ang amahan nga pun-an ang iyang sustento apan mibalibad siya. Samtang nagdako ang akong anak, nag increase sab ang iyang panginahanglan ilabi na gyud sa iyang pag-eskwela. Kining amahan aning bataa nagtrabaho sa gawas. Sa matag higayon nga ako siyang sulti-an nga paumentuhan ang sustento, iya kong hulgaon nga iyang kuhaon ang akong anak. Ang akong pangutana kun mamahimo ba nako nga papun-an ang sustento? Mamahimo ba diay nga iyang kuhaon ang akong anak? Asa man ko modangop aron mahusay mi sa amahan aning akong anak? Daghang salamat. -- Mikaela

Dear Mikaela,

Basi sa atong balaod, ang amahan sa bata obligado nga mosuporta niini, ug ang amount magdepende sa panginahanglan sa bata ug sa capacity sa amahan. Sa imo nga kaso 4 mil pesos lang ang support, kun dili kini igo sa panginahanglan sa imong anak matag buwan, mamahimo ka nga mo-demand og umento sa sustento, Imong kwentahon kun pilay monthly expenses sa imong 11 anyos nga anak lakip na sa iyang education aron mao kana ang imong idemand ngadto sa amahan sa bata. Samtang kalabot sa iyang hulga nga kuhaon ang imong anak, dili kini basta-basta nga mahimo sa amahan kay basi sa atong balaod, kun ang bata illegitimate, ang inahan maoy adunay parental authority niini, ug makuha lang kini sa amahan kun boluntaryong ihatag sa inahan o kun adunay court order. Apan aron pag-settle niining inyong issue mamahimo ka nga modangop sa DSWD og mangayo kanila og assistance aron pagsettle sa inyong problema sa support. Mamahimo sab ka nga magpahimo og demand letter sa abogado. Apan kon di gyud gihapon siya mosanong, mamahimo ka nga modangop sa korte. Thank you ang God bless. -- Atty. Divine

Alang sa inyong pangutana, palihug lang sa pag-email sa flores_divina@yahoo,com ug akong tubagon ang inyong pangutana, pinaagi sa akong column matag Miyerkules, Sabado ug Domingo.