Nahadlok kaha ang mga kriminal?

Kong molihok lang diay ang mga tinugyanan sa balaod mahadlok man diay ang mga criminal. Tan-awa sukad nagsige og patrolya ang mga police subay sa reactivation sa Oplan Bulabog o Galugad sa tinagalog pa, wala nay nahitabo nga krimen sama sa pagpamusil. Maayo unta kong magpadayon nga magmingaw ang dakbayan sa Sugbo sa mga krimen nga nakapaalarma sa katawhan.

Wala pa lay duha ka semana sukad sa simultaneous anti-criminality campaign nga gimando ni Col. Enrico Figueroa kada gabii nagmingaw ang mga tampalasan kay ila man gyud gisuhid ang mga dapit nga sagad salagan sa mga dautan.

Kini ang tinood nga proactive measure kay nabatyagan man gyud, dili lang pud seguro ni sulagma lang nga mingaw ang mga krimen karon apan mas maayo nga magsustinehan kini sa kapolisan. Nagpakita lang kini nga dili kinahanglan nga pamatyon ang mga kriminal aron mahadlok kay kong mahimo nga hadlokon sila daan pinaagi sa presensya sa mga otoridad aron walay mobanaw nga dugo.

Sa gipadayag ni Col. Figueroa nga ang mga pulis na mismo ang moadto sa mga dapit sa mga criminal, dili na sa maghuwat nga naay mahitabo ayha nila respondehan. Maayo kaayo kini nga pamaagi nga angayan sundon sa ubang mga dapit.

 Pastilan kong mag sige og operasyon ang kapolisan sa dakbayan sa Sugbo, basin baya og didto na usab ang mga kriminal modayo sa mga silingan nga dakbayan kay natulog pa ang mga pulis o naglingkodlingkod pa samtang nagpaabot nga dunay mahitabo. Bitaw dili kini layo nga posibilidad kay mangita man ang mga dautan og dapit dili sila madakpan ug dili naman sila ka arte sa Cebu City kay gibantayan naman sila og maayo karon.

Mas maayo nga dunay koordinasyon ang mga kasikbit nga mga LGU sa pagpatuman sa peace and order kay kong mosibat ang mga kriminal madakpan usab dayon.

Haum kang nga daygon ang gihimo karon sa CCPO nga nagpahigyon og mga programa makita gyud ang resulta, dili lang kutob sa baba o sa plano kon dili himoon gyud nila. Kanang mga outpost sa mga karsada basin gipakagamay na sa uban apan dako kaayo na og tabang sa dali nga pagresponde sa mga panghitabo.

Mismo si Mayor Raymond Alvin Garcia ang nakakita sa gihimo sa CCPO. Hinoon sinugdanan pa lang kini ug misaad siya sa hugot nga suporta pinaagi sa paghatag og dugang mga kahimanan sama sa mga mountain bikes nga magamit sa pagpatrolya sa mga police inay maglakaw lang.

Karong adlawa gikatakda ang groundbreaking sa 50 million pesos nga bag-ong building sa CCPO diin nagpakita sa dakong suporta sa LGU ngadto sa atong kapolisan, syaro og dili kini tugbangan, segurado gyud kay karon pa lang duna namay nahimo ug nakita na ang resulta sa ilang programa.

Good job Cebu City PNP, unta dili lang sa sinugdanan kon dili mapadayon kini alang sa kaayohan sa tanan.