Labing alaot sa impeachment
Labing napilde sa iyang impeachment sa House of Representatives mao si, nakatag-an ka, Bise Presidente Sara Duterte. Mapugos pag-atubang sa impeachment trial sa Senado kay nibarug batok niya ang kinadak-ang mayoriya human sa impeachment ni kanhi Presidente Joseph Estrada sa 2000 ug anhing Chief Justice Renato Corona sa 2011.
240 sa 306 ka kongresista, apil nang mayoriya sa iyang teritoryo sa Mindanao, ang nisalikway niya. Kapin sa 75% sa mga representante sa mga distrito (nga nahimutangan sa 52.5 milyones ka rehistradong mga botante) ang nidemanda pagpalagpot niya sa puwesto.
* * *
Napapas ang iyang paboritong panagang sa tanang pangutana giunsa paggasto ang confidential funds sa Office of the Vice President (OVP) ug sa Department of Education (DepEd) sa siya pay education secretary: Nga 32 milyones ang nibotar niya sa 2022, labaw sa nakuha sa mga kongresista nga nangahas paghisgot og accountability.
Para ni Duterte, sa wala pang impeachment, dili siya madutlan sa bisan unsang pasangil sa pangawkaw kay siyay nakakuha sa labing makabungog nga mayoriya sa kasaysayan. Dili na karon. Kinabag-an sa mga botante nideklarar na nga dili siya kublan.
* * *
Naparot sab si Duterte kay napamatud-an sa mga kongresista, bisan sa tanang eskandalo sa ayuda ug pork barrel, nga wala mahudlat sa iyang popularidad, kaisog ug ka walay batasan. Bisan ang hulga sa iyang manghod nga hutdon ang mga Ilokano kon makabalik sila sa Malakanyang wala makapatalaw sa mga kaatbang.
Ambot unsay rason sa ilang pagpirma sa impeachment complaint–prinsipyo ba o dugang pork–mahatagan na og kinutoban ang pag-insulto sa mga pagsuway pagpatubag niya giunsa paggasto ang buhis sa katawhan.
* * *
Bisan unsaon paglangay, dunay impeachment trial. Nga mo-abli sa iyang joint bank account uban ni kanhi Presidente Rodrigo Duterte. Mahibaw-an na gyod pilay gitagoan: P2.4 bilyones ba segun ni kanhi Senador Sonny Trillanes niadtong 2017? O P5 bilyones ba segun sa kanhi presidente nga niatubang sa House Quad Committee niadtong Nobyembre?
Bisan mo-resign siya, moinsistir ang mga kongresista nga tiwason ang husay aron kapahamtangan siya og perpetual disqualification sa paghupot og puwesto sa gobyerno. Kon makonbikto, dili siya maka-apelar, dili masalbar sa Korte Suprema, ug dili ma-pardon bisan alyado pa niyang sunod nga presidente.
* * *
- Latest
