Unsaon pagpangil sa utang kon atua sa abroad ang nangutang?

Dear Atty. Divine,

Mangutana lang unta ko kun unsaon nako paggukod ang akong amiga nga dili na makontak paninglon, naa siya sa Taiwan karun. Ang iyang utang P175,000.00 ug ang among sabot nga end of week sa November or first week sa December 2024 siya mobayad . Apan hangtud karun wala na nagparamdam. Ang akong gihuptanan kay mga screenshots lang sa among conversation sa messenger ug receipts sa online transactions, ang uban wala nakapangalan sa iyaha. Unta matagaan og pagtagad ang akong pangutana. Daghang salamat. -- Clar

* * *

Dear Clar,

Mamahimo nimo siyang padad-an og demand letter, apan kun atua pa siya sa Taiwan ug wa ka masayud sa iyang address, mamahimo nimo siyang padad-an og demand letter sa iyang address dinhi sa Pilipinas. Kun iyang ibalewala ang imong demand letter, mamahimo nimo siyang suwayan sa pagpapasaka og reklamo sa barangay nga iyang gipuy-an, kini aron ma aware siya nga nagsugod ka na sa paghimo og mga legal nga lakang. Mopatawag na ang barangay kaniya ug kun aduna siyay pamilya sa iyang gipuy-an at least masulti-an siya nga aduna kay gipasaka nga reklamo. Kun di gihapon siya mokontak kanimo aron sa pagbayad, then pasakai siya og reklamo ngadto sa Korte. Kanang imong mga proof sa transaction ug mga messages mamahimo kana nimong gamiton as proof sa iyang utang, ug ang imong gamiton nga address mao ang iyang address sa Pilipinas. Mopatawag na ang Korte kaniya ug kun di siya makatunga then ang Korte moresolbar sa imong kaso basi sa imong ebidensya ug kun mopabor ang Korte kanimo then momando ang korte kaniya sa pagbayad kanimo sa iyang utang, ug mao kini ang imong gamiton sa pagpaningil kaniya ilabi na kun mabalik na siya sa Pilipinas. Thank you and God Bless! -- Atty. Divine

Alang sa inyong pangutana, palihug lang sa pag-email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.