Huwag ningas kugon ang HPG sa Marilaque!
HINDI lamang dapat sa Marilaque Highway sa Tanay Rizal tumutok ang mga tauhan ni Highway Patrol Group (HPG) director BGen. Eleazar Matta kundi sa iba pang mga kalsada o highway dahil sa mga nagaganap ng aksidente. Marami ngayong pasaway na drayber at dispalinghado ang kanilang mga sasakyan.
Nag-viral ang stunt ng dalawang kamote riders sa Marilaque Highway noong nakaraang linggo. Nagkagitgitan ang dalawang kamoteng riders at isa sa kanila ang namatay. Sumemplang ang dalawa at bumangga sa mga nakaparadang motor ng mga nanonood sa tabing kalsada.
Mahirap mahuli sa akto ang mga nagkakarera. Nalaman ko rin na may ilang anak ng mga pulitiko na nakikisawsaw sa pasiklaban ng mga motorsiklo at kotse sa Marilaque Highway.
Kaya ang suhestiyon ko, bigatan nang husto ang parusa sa mga nasasangkot sa drag race.
Hindi sana ningas cogon ang aksyon ng HPG sa pagpakalat ng kanilang mga nagtatabaang pulis sa Marilaque Highway. Kung pakitang tao lang ang paghihigpit ng HPG, marami pang buhay ang mauutas.
Tiyak na tumityempo lamang na malingat ang HPG at muli na naman magkakarera ang mga kamote sa Marilaque Highway.
Magpakalat din ang HPG ng mga pulis sa mga highway sa labas ng Metro Manila upang mahuli ang mga pasaway na drayber na nag-ooverload ng kanilang kargamento at maging pasahero.
Samantala, dapat din namang kumilos ang mga taga-Department of Transportation na mag-inspection sa mga terminal ng bus. Maraming bus ang naaaksidente dahil may depekto ang mga ito. May mga nawawalan ng preno.
Maging ang mga drayber ay dapat isailalim sa drug test upang masigurong nasa maayos na katauhan ang mga ito bago bumiyahe.
- Latest
