Welcome 2025

Katapusang adlaw karon sa tuig 2024. Karong tungang gabii, sugaton na nato ang Bag-ong Tuig 2025. Iampo nato nga mauswagon unta ang atong kahimtang sa tuig 2025, apan abagan usab nato og paninguha nga maangkon nato ang atong mga pangandoy, dili kita magtinapolan.

Kay eleksiyon na man karong Mayo, unta undangon na ninyo ang batasan nga kadtong makahatag ninyo’g kwarta mao ra’y inyong botohan. Ang “wise voter” mao kadtong mopili sa mga kandidato nga sinsero nga mangalagad kanatong katawhan.

Garbo ko nga mosulti kaninyo nga sa kadugay na nako nga nahimong botante, bisan kausa wa gyud ko makadawat og kwarta aron nga ang mihatag maoy akong botaran. Mauwaw tingali sila nga mohatag og kwarta aron lang botohan.

Sa akong programa sa radyo DYLA, sagad mohatag ko og ideya kinsa ang mga kandidato nga angay’ng botohan base sa pwesto sa gobiyerno nga gustong angkonon. Kadaghanan gud sa mga botante wa makaila kon kinsa ang mga maayong kandidato.

Sagad sa mga botante makadungog lang sa mga kandidato kon mangampanya kini sa tagsa-tagsa nila ka dapit, ug ang uban gani wa makadungog kay di man sila motambong og mga pulong-pulong sa mga politiko.

* * *

Gipanglantawan nga mas alegre ang Sinulog Grand Parade dinhi sa Cebu City karong Enero 19, ikatulong Domingo sa buwan. Kining adlawa maoy piyesta ni Señor Santo Niño.

Ibalik na ang carousel type nga ang mga Sinulog contingents mosayaw sa mga karsada gikan sa P. Del Rosario, Imus Avenue, Carreta, General Maxilom Avenue, Fuente Osmeña, dayon sa Osmeña Boulevard ug lahos na sa Cebu City Sports Center.

Sa miaging tuig nga didto sa South Road Properties ang Sinulog Grand Parade ipahigayon, gihulagway nga dili kaayo bibo kay daghan ang gilayoan ug lisud sab kon dunay manginahanglan nga motubag sa sugo sa lawas.

Mas daghan sab ang miapil sa Sinulog Grand Parade karong tuiga kon itandi sa miagi. Ikaduha, menos og gasto ang siyudad, dili sama kaniadto nga ang mga aspalto nga alang unta sa mga karsada, nagamit ra didto sa SRP kay pwerte mang lapoka.

Unya, migasto pa ang siyudad sa paghimo og Grand Stage, apan sa pagbalik sa venue diha sa Cebu City Sports Center, wa kaayo’y gastohan kay anaa na may sports center.

Ang mga manan-aw, daghan sab og kapasilongan nga dili kaayo sila mabantang sa kainit sa adlaw. Si Presidente Bongbong Marcos gidapit ni Mayor Raymond Alvin Garcia nga motambong sa kalihokan.

Apan kon ako’y pahukmon, maayo ra nga dili motambong si Marcos kay daghan ang masakripisyo kay estriktohon man pag-ayo ang siguridad, mga ballpen, tinidor dili tugotan nga ipasu’d sa sports center.