Nagpabaya sa trabaho

Angay nga ipaimbestigar kon kinsa ang mga opisyal ug kawani sa Department of Health (DOH) nga angay’ng silotan kay na-expire na lang ang daghang tambal nga kantidad og P11 Bilyones nga wa gyud magamit.

Kining maong mga tambal, kadaghanan niini pang-alkontra unta nga dili modagsang ang coronavirus (Covid-19), ug duna pay ubang mga tambal nga wa ra gyud magamit.

Wa kini magpasabot nga way mogamit, kon dili wa ra gyud kini madapat ngadto sa mga tawo nga angayang hatagan unta niini. Kini maoy akong sukaranan sa pag-ingon nga angay’ng silotan ang mga hingtungdan.

Maayo gani kay base sa lista nga gipagawas sa balita, way mga government hospital dinhi sa Sugbo nga dunay mga tambal nga ni-expire na lang. Didto sa DOH central office, pwerteng daghana sa mga tambal nga wa magamit.

Sa ato pa, wa nila kini mahatag ngadto sa mga government hospitals sa lainlaing dapit sa nasud? Sus, kon gihatag pa kini sa ubang mga tambalanan, tingali dili mausik ang maong mga tambal ug maprotehean pa ang panglawas sa katawhan.

Matud sa Commission on Audit (COA) nga maoy nakasakop niini, duna kuno’y mga ospital nga dili modawat sa maong mga tambal nga panguntra sa Covid kay wa sila’y mga storage facility.

Kini gud nga mga vials sa Covid kinahanglan ni nga isulod gyud og storage facility nga mamentinar ang iyang kabugnawon aron dili mahupas. Kon mao man gani kini ang rason nga way manawat, unsa may gihimo sa DOH aron mahatagan og sulbad ang problema?

Gawas sa mga tambal nga mi-expire na, daghan pa nga mga tambal nga hapit na sab mo-expire. Unsaon, ang DOH duna untay “policy” nga ang mga tambal nga isuplay kanila sa mga suppliers, dili nila dawaton kon ang expiry date sa mga tambal wa na makaabot og usa ka tuig ug tunga.

Gidawat man gihapon nila bisan og hapit na mo-expire ang mga tambal. Mora’g makapaduda kini nganong gidawat nila. Angay gyud kini nga imbestigahon.

* * *

Daghan na kaayong gustong mangapil sa Sinulog Grand Parade dinhi sa Cebu City karon nga gipahibawo ni Mayor Raymond Alvin Garcia nga ang maong kalihokan ibalik na diha sa Cebu City Sports Center.

Kon anha hinuon sa Cebu City Sports Center, dili na kinahanglang mogasto pa ang siyudad sa pagpagama og dakong stage sama dihang didto sa SRP gihimo sa miaging tuig.

Ikaduha, daghan ang manan-aw kay carousel type man ang pagsayaw ug daghang tawo ang makasaksi. Kon sa SRP ipahigayon, traffic man gihapon kay panirad-an man ang mga karsada dinhi.

Mas maayo pa og dinhi na lang sa siyudad. Ang deadline sa pagpanglista sa moapil, Disyembre 13 ha.