War on drugs
Pipila ka viewers sa among mga programang “Baruganan” ug “Panahom sa Kilumkilom” sa YouTube ug Facebook nihatag sa mosunod nga mga rason nganong nihunong sa ilang naandang pagtukaw og tan-aw sa public hearings sa House Quad Committee ug House Committee on Good Government sugod sa buntag hangtod tungang gabii o kadlawon sa sunod adlaw:
Kasagaran sa mga isog nga nangimbestigar nagpakahilom sa drug war atol sa administrasyon ni kanhi Presidente Rodrigo Duterte tungod sa kahadlok ug sa pork barrel, maong nanagana sa pagbadlong sa mga bakak ug balikas ni Duterte sa iyang pag-atubang nila;
* * *
Gipatuyangan nila og pa-istorya si Duterte sa tibuok adlaw ug tibuo gabii pero ang mga tagtungod sa mga biktima sa extrajudicial killings gilimitahan og tag-duha ra ka minuto;
Dihang nipakita, nanumpa ug andam nang manubag sa ilang mga pangutana si Bise Presidente Sara Duterte, human sa pila ka buwan nga likay-likay, wala nila pangutan-a sa mga bulilyaso sa iyang confidential funds hangtod nga nibiya na lang dihang nasakit si Office of the Vice President (OVP) disbursing officer Gina Acosta;
* * *
Pipila nila nag-usik og mas dakong panahon pagpanalipod sa ilang kaugalingon gikan sa trolls sa mga Duterte sa social media imbes sa pagtuki sa mas importanteng mga isyu;
Wala nila imbitaha pagbalik si kanhi Cebu City Mayor Tommy Osmeña pag-detalye sa laktod nga pinatyanay nga gipasangil batok nilang Koronel Royina Garma ug Heneral Debold Sinas sa Sugbo ug Central Visayas sa 2018 ug 2019 human gisultihan nga kontra sa administrasyon si Osmeña ug magguba ang credibility ni Garma nga ilang gibuhian, nakaikyas hinuon ug maayo na lang naposasan sa Estados Unidos;
* * *
Wala nila imbitaha si kanhi Bise Presidente Leni Robredo bisan sa kasayuran, dihang siya pay anti-drug czar ni Duterte, nga kasagaran sa shabu sa Pilipinas gikan sa China, kay posibleng karibal silang House Speaker Martin Romualdez sa eleksiyong presidensiyal sa 2028; ug
Gikutikuti nila ang kadudahang mga gasto sa P612.5 milyones nga confidential funds sa bise presidente sa 2022 ug 2023 pero walay bisan usa nga na-interes giunsa paggasto ang mas dakong P9 bilyones nga confidential ug intelligence funds ni Presidente Ferdinand Marcos Jr. sa niaging duha ka tuig.
* * *
- Latest
